Тассай

Төрт түлікті тірлігіне арқау еткен Тассайлықтар қыстың қамын жаз ойлап пішенін маялап қорасын жайлап, ашасын сайлап алған. Көл жағасын мекен еткен дырдуы мол, әмияны қалың балықшы ауылына көмір керуені де толассыз келіп жатады. Аулымыздағы жағымды бір жаңалық округ әкімі Ержан Құдайбердіұлының іскерлігімен Омск- Майқапшағай тас жолының Тассай елді мекеніне бұрылатын жол айрығына «Тассай ауылын» айшықтайтын айдарлы белгі «арка» қойылып, ауылдың дәл ортасынан шағын футбол алаңы салынды.

Өткен аптада ауданның бас имамы Нұр Нәсір Дүйсен Белое ауылындағы Октябрь мектеп-бала-бақша кешенінің оқушыларымен кездесіп, тағы-лымды әңгіме өрбітті. Өскелең ұрпақты иман-дылыққа баулыған келелі кездесуге аудандық ішкі саясат бөлімінің басшысы Бек Нұғыбаев қатысты. Кездесу мақсаты жасөспірімдерге дін туралы жан-жақты түсінік беру, оларды діни түрлі жат ағымдардан сақтандыру.

Бүгінде береке-бірлігі жарасқан айрандай ұйыған Сүлеймен ауылында барлығы 30 жанұя тұруда. Ауылдың еңкейген қарттары мен жүгірген баласына дейін жаны жайсаң, кішіпейіл, қонақжай, қоғамға жақсылық жасауға дайын тұрғындары ауылдың береке-бірлігін көрсетіп, игі іс жасады. Нақтырақ айтар болсақ, ескі мектеп ғимаратын ауылдағы өтетін жиындар мен мерекелік іс-шараларға арнап жөндеу жұмыстарын жүргізді. «Жұмыла көтерген жүк жеңіл» дегендей, ауылдың жастары, жас жанұялар орта буын ағалардың қолдауымен өз қаражаттарына ескі ғимаратты кеңейтіп, сылап-сырлап, ішіне пеш салып, қалыпқа келтірді.

Тассайдың төл баласы Жанат Ыбырайымтегі, бағзыда өткен ата-бабасын еске ала, Ұлы Отан Соғысының ардагері, от кешуден есен келіп, еселей еңбек етіп, бейбіт күнде фәниден ертерек өткен қарт жауынгер, әкесі Қайырғазыға ат шаптырып ас беріп жатыр.
Аламан бәйгенің шаңы көрінді. Ат көмбеге таяды. «Ат келе жатыр, ат келе жатыр» десіп шуылдасқан дүрмек топ.

Әне-міне дегенше сәйгүліктер келіп те қалды. Терден қоңырайған ба, болмаса түсінің өзі торы ма айырғысыз ұзын бел торы тұлпар жер апшысын қуырған екпінімен мәре сызығын кесе көмбеге де жетті. Ұран тастай аруақ шақырған шабандоз баланың айбатты шырылынан тұлпар иесінің кім екенін білдік ау. «Тассай, Тассай, Тассайдікі Заманның аты десті ел. Толқынысын білдірмей тоқмейілси ыржиған жігіт ағасы Зәкең риза кейіппен қарайды.