Наурыз – шығыс халықтарының ертеден келе жатқан мейрамы, күн мен түн теңеліп, қыс ызғары кетіп, көктем келеді. Қазақ елі Ұлыс күнін әрқашан қасиетті, киелі санаған.
Осы наурыз мерекесіне орай Жаңа жол бастауыш шағын комплектілі мектебінде «Қош келдің, Әз-Наурыз» атты ертеңгілік өтті. Бұл мерекеге барлық бала атсалысты. Кез келген той шашу шашудан басталады ғой. Ертеңгілігімізге әже келіп, ақ тілегін айтып, шашуын шашып, мерекелік концерт басталды. Камила Майтжанова, Томирис Низамиева, Даяна Құрманғалиева, Гүлім Солтанғазина, Жансая Тоқтавбаева «Қыз Жібек» биін шебер орындап, көрерменді тамсандырды. Ал ұлдар тобы Рамазан Ринатоллаев, Сабыржан Алибеков, Саян Тоқтавбаев, Бекжан Әлібеков орындаған «Бозжорға» биі келген қонақтар қошеметіне ие болды. Біздің мектептің оқушылары сегіз қырлы, бір сырлы.
Ең соңында ақ түйені жетектеп Қыдыр ата мен Наурыз гүл келіп тілектерін айтып, Қыдыр ата батасын берді. Бұл мереке біз үшін есте қаларлықтай қызықты өтті.

Камила Майтжанова,
4 сынып оқушысы

Күн жылынғаннан бастап, Көкпекті ауданы аумағында төтенше жағдайлардың алдын алу мақсатындағы жұмыстар қолға алынды. Қазір облыстағы барлық аудандар осы бағыттағы шаруаларға айрықша назар аударуда. Жыл сайын көктемгі су тасқынына қарсы шаралар уақытында қолға алынады. Биыл да ауданда арнайы штаб құрылып, су алып кету қаупі бар аймақтарға баса назар аударылып отыр. Округтер бойынша төтенше жағдайдың алдын-алу жұмыстары төмендегідей.

КӨКПЕКТІ. Көктемгі су тасқынының алдын алу үшін 250 қапқа құм толтырылды. Ауылдық округ әкімімен көпірлерді тазалау, бөгеттерді нығайту және өзен арналарын тазарту бойынша жұмыстарды жүргізуге қосымша техника тарту үшін, жеке кәсіпкерлер, шаруа қожалықтар, ауыл шаруашылық құрылымдар, кәсіпорындар және ұйымдармен 25 келісімшарт жасалды. Көкпекті ауылының су жинағыш тоғаны транзиттік жағдайда жұмыс істеп тұр. Бүгінгі күні округте ауа райы бірқалыпты.

Көк тасты ерітпесе де көңілді еріткен күн болды. Адамзат тілегін тәңірінің өзі сезінді ме, әлде жаратылыстың тылсым сырының бірі ме, кеше кешкісін азынап тұрған күн райы бүгін ала бөтен ерекшеленіп тіршілік атаулыға нұрын төге салды.
Күннің көзі жарқ етті. Орталық алаңға қарай ағылған жұрт үлкен дүрмекті құрады. Сонау айдын көлдің жағасын мекен еткен Үшкөмей аулынан шыққан, қайқы бел қазақы арғымақтың ортан беліне нығыздала отырған жақсысы мен жайсаңы, байы мен бәйбішесі солқылдаған жас жігіттер мен қыз-қырқыны аралас қарқара топ ән-жырын асқақтата жетті. Паһ, шіркін! Әлеумет таңдана қарасты.

Қыстың ызғары тарамаса да, Наурыз мерекесі күні көктен құйылған күн нұры тойлы ауылға шуағын аямай төгіп тұрды. Мектеп ауласына құрылған киіз үйдің айналасы ауыл тұрғындары мен қаладан келген қонақтарға лық толды. «Мейірбек» шаруа қожалығы құрған алтыбақанға тербелген балалар қызыққа әбден кенелген. Ұлттық киімдерін киіп, көтеріңкі көңілмен қауышып көріскен жұр бір-біріне игі тілектерін айтуда. Салтанатты мереке І.Жансүгіров атындағы орта мектептің акт залында оқушылар мен ауыл өнерпаздарының мерекелік концертімен бас-талды, мұнда да ине шаншар жер болмады, әсіресе тамылжыта ән салған Ақбота Ахмадиева мен көңілді тапқырлардың өнеріне жиналған жұрт аямай қошемет көрсетті. Ауыл ақсақалы Төлеу Жақыпбеков батасын беріп, ардақты батыр ана Үміт Құсманова шашуын шашты.
Мерекенің екінші бөлімі аулада «Алеке» шаруашылығы құрған киіз үйдің маңына жайылған мерекелік дастарханмен жалғасты. Мектеп ұжымы мен Ескі ауыл көшесінің тұрғындарының ақ дастарханы ұлттық тағамдарға молынан толды, тамашаға келген кәрі-жастың барлығы дәмнен шет қалмады. «Берік», «Қалима», «Тұлпар», «Мират» шаруа қожалықтарының ұйымдастыруымен Саяхимов көшесінің азаматтары тайқазанға ұлттық ас мәзірі сірне әзірлеп, әкімдік қызметшілері палау, «Әділет» шаруа қожалығы кәуап әзірлеп таратты. Мелитополь ауылының тұрғындары да ұлттық тағамның бар түрімен толтырылған мерекелік дастарханын ауылдастарына жайып, наурыз көжелерінен дәм татқызды. Барлық жарыстарға қатысқан тұрғындарға ауыл әкімі өз атынан марапат қағаздары мен қаржылай сыйлықтарын табыс-тады. Мелитополь ауылынан бір топ болып келген тойшыл қауымға да жайылған ұлттық дастархан мәзірі үшін бас жүлде берілді.
Иә, ұзақ қыстың шаруасынан қажыған жұрт бір серпілгендей болды. Таңертең басталған той түс ауа спорттық ойындарға жалғасты.