2024 жылдың 2 тамызы күні аудандық мәдениет, тілдерді дамыту, дене шынықтыру және спорт бөлімінің ұйымдастыруымен Қазақстандық топонимдік жүйесін диахрониялық тұрғыдан зерделеу мақсатында ауданымызға келген экспедиция мүшелері зиялы қауыммен кездесті.
Кездесу 125 жылдық тарихы бар өңіріміздегі байырғы кітапханалардың бірі - Көкпекті аудандық кітапханасында өткізілді. Бұл отырысқа Астана қаласынан келген ғылыми-зерттеу тобының мүшелері-филология ғылымдарының докторы, Евразия Ұлттық Университеті профессоры Әбдуәлиұлы Бекжан, география және су қауіпсіздігі институтының ғылыми қызметкері Тоғыс Мәулен Мырзағұлұлы және Көкпекті аудандық ардагерлер кеңесінің төрағасы Сләмбек Мұқашев, тарихшы-өлкетанушы Қайрат Малғаждаров, айтыскер ақын Фархат Маратұлы, аудандық “Жұлдыз-Новая жизнь” газетінің директор-редакторы, аудандық маслихат депутаты Дархан Бердібекұлы, кітапханашылар және бөлім мамандары қатысты.

Мақаншы ауданы Ақшоқы ауылында өткен ұлы аламан бәйгеде Көкпекті ауданының жүйрігі Көктұйғын топ жарды. Ұшқан құстың қанатын талдырып, тұлпардың тұяғын тоздыратын кең-байтақ еліміздің төрт қиырынан атбегілер келіп, желмен жарысқан 40-қа жуық сәйгүліктің бабы сыналған дүбірлі дода болды.
Бұл күні жарыс жолына шыққан сәйгүліктер аламанның көркін қыздырды. Құйрық-жалы төгілген кілең тұлпарлардың қолтық жазуы да жанкүйердің жан-жақтан қиқу салуымен қызықталды. Сөреден тізгін жіберген жүзден жүйрік, мыңнан тұлпар деген 37 сәйгүлік даланы дүбірлете 30 шақырымға бауыр жаза көсілді.

Көкпар – нағыз ерлер ойыны. Егінбұлақ ауылында білектілер мен жүректілер жарысы абыроймен өтті. Командалық көкпар ойыны өткізілген аудандық жарысқа 4 құрама қатысты. Жарыс жеңімпазы Ақой және Үлкенбөкен ауылы көкпаршыларынан құралған «Көкпекті жастары» командасы.

Егінбұлақ ауылының тумасы, белгілі кәсіпкер, елжанды азамат Дамир Геккель ұлы Арманның 1 жас тойына орай командалық көкпардан аудандық жарыс өткізді. Дүбірлі додаға Көкпекті аудандық Ұлттық спорт ойындары орталығының мамандары басшылық жасады. Биғаш ауылдық округінің әкімі Қайрат Ахметқалиев шараның ашылуында құттықтау сөз сөйлеп, спортшыларға сәттілік тіледі. Шараның жоғарғы деңгейде өтуіне Егінбұлақ ауылының тұрғындары бір кісідей атсалысты. Көршілес Биғаш, Жарық ауылының азаматтары да ортақ қуаныштан тыс қалмады.

27 мамыр күні  ауданымызда  «Арлан» шығармашылық орталығының салтанатты ашылуы өтті. Оған арнайы шақырылған  қонақтар, еңбек ардагерлері, орталықтың ұстаздары мен оқушылары қатысты.

Ашылу салтанаты аясында еңбек ардагерлері және аудандық ардагерлер кеңесінің мүшелері Рауия Наурызбаева мен Гүлбаран Ақшабаева, ардагер ұстаз Сәуле Бекова, мәдениет, тілдерді дамыту, дене шынықтыру және спорт бөлімінің басшысы Әлібек Саржанов, және ата-ана Гүлжиян Сәрсенбаева қатысып, құттықтау сөз сөйледі. Орталықтың тәрбиеленушілері қонақтарға әннен шашу шашты. Мекеменің ашылуында қызыл лентаны қию құрметі Сәуле Байтілеуқызы мен Әлібек Түсіппекұлына берілді.
Шығармашылық орталығының директоры Маржан Ерболатқызы өрендер орталығымен таныстырды.