Аудан әкімі Ділдәбек Оразбаев 16 тамыз күні арнайы жұмыс сапарымен Тассай ауылдық округіне барды. Жұмыс сапарын жол бойындағы Бөдес ата мазарына зиярат етуден бастады. Мазар басында Тассай ауылының азаматтарымен кездесу өткізіп, құран бағышталды. Әулие Бөдес ата мазарын абаттандыру жұмыстарының жоспары талқыланды.

Айта кетейік, өткен жылы Тассай ауылының азаматтарымен кездесуде аудан әкімі Ділдәбек Оразбаев өз тарапынан Әулие Бөдес ата мазарын абаттандыруды қолға алу бастамасын көтерген болатын. Аудан басшысының игілікті бастамасын барлық азаматтар бір ауыздан қолдап, абаттандыру жұмыстары бірден басталып та кеткен еді. Көп жылдар бойына Тассай халқының көкейінде жүрген үлкен іске осылайша тың серпін берілді.

Ұлы Дала Елі алаңында Абай күніне орай «Ұлы қазақтың ұлы Абайы» атты тақырыптық концерт өткізілді. Іс-шараны Қалихан Алтынбаев атындағы аудандық мәдениет үйі ұйымдастырды. Онда Ұлы ақынның өлеңдері шырқалып, халық рухани байыды. Көкпекті ауылының тұрғындары ұлы ақынның шығармашылығын тыңдау үшін аудандық мәдениет үйінің өнерпаздары дайындаған концертті тамашалауға алаңға жиналды.
10 тамыз – Абай күніне орайластырылып ұйымдастырылған шарада аудандық мәдениет үйінің өнерпаздары ұлы ақын һәм ойшылдың көпшілікке танымал, шоқтығы биік музыкалық шығармаларын орындады. Олардың қатарында Абайдың «Көзімнің қарасы...», «Айттым сәлем, Қаламқас» сынды әндері мен «Желдірме», «Торжорға» сияқты күйлері болды.
Тақырыптық кеш шымылдығы «Толағай сазы» фольклорлық ансамблінің орындауындағы «Тор жорға» күйімен ашылды.

Көкпекті аудандық кітапханасының «Өлкетану» жоспары бойынша Биғаш ауылдық округінде «Апрым ата – дала кітапханасының бастауында» деген танымдық-тарихи семинар болып өтті. Семинарға Көкпекті ауданы орталықтандырылған кітапханасы меңгеруші Айтжамал Ибраева, кітапханашылар Жұлдыз  Жақыпова, Әйгерім Маханова, Қайрат Малғаждаров, Биғаш ауылдық округі әкімі аппаратының маман-хатшысы Гүлмира Исмаилхаджиева, Биғаш ауылдық кітапханасының меңгерушісі  Айтжамал Момбаева, Биғаш негізгі мектебінің кітапханашысы, ауылдық кітапхананың оқырмандары қатысты. 

«Бір Аллаға сиынып, кел балалар оқылық!» - деп басталатын дала қоңырауын қаққан, білім нұрын шашқан Ыбырай Алтынсарин атамыздың осы өсиетінің басты жолын білмей өскен кезіміз де болды заманында. Егемендікке қол жетіп, Тәуелсіздік туын көтергелі шашылғанымызды жинап, ұмыт болғанымызды жаңғырта бастадық. Күллі қазақтың қасиетті төрі Түркістанымызды иманымыздың көркі, дініміздің төрі, рухани астанамыз екенін де танып-біліп, табыстық. Биыл Түркістан облысы құрылғалы 5 жыл толғанда әулие Бөдес атамыз жатқан жерден, от ауызды, орақ тілді Кегенбай атамыз туған елден, Жомарт батыр ту көтерген белден ұрпақтары қасиетті Түркістанға бет бұрды.  

Аудан әкімі Ділдәбек Оразбаевтың қолдауымен Тассай ауылдық округінің өнерпаздары Түркістан қаласында өз өнерлерін көрсетіп қайтты. Осы сапарға демеушілік еткен ауданымыздың беделді азаматтары - Ержан Тұрсынханұлы, Гүлназ Құдайбергенқызы, Бахтияр Жанатұлы, Марат Қалиханұлы, Жұмабек Құрмашұлы, Бақытжан Болатханұлы, Айдын Еркінұлы, Ильнур Фархатұлы, Берік Қанаұлы мен Ғабиден аға мен мәрт жүректі Қайрат мырза болды.