Өткен аптаның сейсенбісі күні Қ.Алтынбаев атындағы мәдениет үйінде аудан тұрғындары Самар өңірі көркемөнер-паздарының күшімен дайындалған концерттік бағдарламасын тамашалады.
Бұл - Алаш қозғалысының 100 жылдығы, Қазақстан Республикасы Мемлекеттік Рәміздерінің 25 жылдығы, Қазақстан Республикасы Қарулы Күштерінің 25 жылдығын атап өтуге орай, Көкпекті ауданы ауылдық округтері арасында ұйымдастырылған «Қазақстанның көк туы желбірей берсін» атты көркемөнерпаздар байқауының жалғасы.

Аудан көлеміндегі барлық округтердің өнерсүйер қауымының басын біріктірген байқауды өткізудегі басты мақсат – тәуелсіздігіміздің тұғырлы екендігін паш ету, ел тұрғындарының бойындағы патриоттық рухты нығайту, сан ұлттар өкілдерінің татулық пен ынтымақтастықта мамыражай өмір сүріп жатқанына ризашылық сезімін қалыптастыру болып табылады.
Самар округінің өнерпаздары осындай шараларға жоғары дайындықпен келетіні аян. Әртүрлі жанрды қамтып, сахна сәнін келтірген әншілер мен бишілерді, вокалдық топтарды көрермен қызу қолшапалақпен қолдай отырды. «Қазақстан», «Ауылым», «Одна калына» украин әнімен МСУ вокалды тобы, ауданаралық аурухана бишілері орындаған «Русский танец», «Цыганский танец», агротехникалық колледж ұжымынан Айдархан Сарбасовтың термесі мен Динара Солтанбекованың «Туған жер» әні, Айжан Бекмұрат пен Ерлан Читояковтың орындауындағы туған жер туралы және махаббат сырын шертетін әндерін көкпектіліктер жылы қабылдады.
Қысқа да нұсқа болған концерт соңында Көкпекті ауылдық окгугі әкімінің м.а. Ерлан Қизатоллаұлы Ниязбаев сахна төріне көтеріліп, самарлық өнерпаздарға алғысын жеткізді. Сонымен бірге, аудан тұрғындарына жағымды сәт сыйлағаны, әр ұлт өнерінің бұлағынан сусындатқаны үшін Мақтау грамотасы мен естелік сыйлығын ұсынып, келгендерге биік жетістіктер, еліміздің тыныштығы мен жұртымыздың амандығын тіледі.

Бақыт МҮЛІКОВА

Пікір: