Бүгін ауыл тірлігін тіптен ерте бастап кетті. Күн шығардағы шыңылтырды суықты елемей алма бетінің ұшын аяз сорып қызартса да қыңқ етпей мерекелік күйге еніп қарбаласып кеткен қауымның қағанағы қарқ. Өйткені, бүгін Тұңғыш Президентіміз жалпы Қазақ елінің тумысында тұңғыш рет президент деген сөзді иеленген күні желтоқсан айының бірінші жұлдызы. Қан мен термен келген азаттықтың аясында пайда болған қастерлі күн болатын.

Мемлекеттік Әнұранмен ашылған дәстүрлі салтанатты шара округ әкімі Е.Мазыбаевтың жерлестерімізді мерекелік құттықтауымен басталды. Ауыл басшысы құттықтаудан соң бүгінгі күннің берекелі бірлігіне тоқталып, ауыл тірлігіне белсене араласып жүрген біраз азаматтарға алғыс білдіріп, марапат жасады. Өз кезегінде «Нұр Отан» бастауыш партия ұйымы төрайымы, зиялы ұстаз әпкеміз С.Чалова барша жұртқа ақ тілегін айтып, бүгінгі мерекеге сәйкес Елбасымыздың ерен еңбегі мен ерлігіне бас иіп, ежелден еркіндік аңсаған бабаларымыздың бүгінгі ұрпағы жеткен алтын ғасырының тарихнамасын жадымызға салып өтті. Ауылдың қадірлі қариясы, Көкпекті ауданының құрметті азаматы Қуан Түсіпбеков ақсақал осынау ұлық мерекеге ойлы орнықты сөздерін арнаса, «Жас Отан» жастар қанаты атынан жас мұғалима «Нұр Отан» партиясының мүшесі М.Жүнісова да жалынды жас тілектерін жолдады. Әр кезең сайын музыкамен өрнектеліп отырған мәдени іс-шараның соңына қарай сахна төріне Тассайдың төлтумасы, аймаққа аты мәлім «Атымтай-жомарт» ауылдасымыз «Қалиқанұлы» шаруа қожалығының басшысы М.Халиков шақырылды. Сонау бір жылдары кіндік қаны тамған ата жұртына тағзым ете келіп «Бөдес Баба» мешітін салып беріп, күні бүгінге дейін халық қамқоршысы боп жүрген бауырымыз Марат баршаға ілтипат білдіре, бүгінгі мерекемен орайластыра еңбегін адал атқарып жүрген біраз еңбеккерлерге өз құттықтауын айтып, құнды сыйлықтар тарту етті. Мерекелік шараның жалғасы Омск-Майқапшағай тас жолы бойындағы жол қиылысында Тассай елді мекенін айшықтап тұратын айдарлы белгінің (Арка) ашылу салтанатының тұсаукесері өткізіліп, ел жиылып, бас қосып, үлкендер шашу шашып батасын берісті. Бәрекелді!
Түс ауа «Әли» дәмханасына М.Қалиқанұлы ауылдастарын мерекелік дастарханға шақырып, құрмет көрсетті. Мәдени іс-шарада ауыл көр-кемөнерпаздары да бар өнерлерін ортаға салды.

К.Байжұманов, Тассай ауылы

Пікір: