Аудандық барлық мектепке дейінгі білім беру мекемелерінде «Алтын күз» тақырыбында түрлі мерекелік шаралар ұйымдастырылуда. Баршамызға белгілі, Туған табиғаттың тамаша бір көрінісі күз мезгілі. Айнала сұлуланып, түрлі-түстерге боялып құлпыра түседі. Бұл мезгілде халық несібесі, ел ырзығы ғана жиналып қоймайды, сондай-ақ оның осы кезеңде ұрпақты еңбекке, отансүйгіштікке баулу, табиғатты тану, Жер ананың қасиетін білу және басқа да игі істер негізінде тәрбиелеу ісінде орны айқындала түседі.
Мәселен, жыл сайын мол байлығын ұсынар күз маусымы келгенде мектептер, балабақшалар тақырыпқа сәйкес безендіріліп, осы бағыттағы түрлі танымдық-мерекелік шаралар тәрбиелік мәні зор құралға айналады. Аталған балабақшаның «Балдырған» тобының тәрбиешілері М.Бекішова мен М.Далабаеваның ұйымдастыруымен «Алтын күз» мерекесі өтті. «Алтын күз» шарасында жас бүлдіршіндерге мағлұматтар берілді. Шара кезінде балалар өздеріне ұнайтын жеміс-жидектер, дәнді дақылдар, көкөністер бейнеленген немесе соларға ұқсастырыла тігілген киімдер киіп, тақпақтар айтты, қойылымдар көрсетті. Бұл өз кезегінде жас өскіннің өз туған жерінің қасиетін ұғынуға, табиғатты сүюді үйренуге көмектеседі.

«Бөбек лүпілі» жеке меншік балабақшасының әкімшілігі

Жаңа оқу жылы жақындап келеді. Өткен жылдың біраз бөлігі қазіргі жағдайға байланысты қашықтан оқытумен өтті. Бүгінде білім күніне орай, барлық жерде дайындық қызу. Ауданда санаулы күндерден соң басталатын жаңа оқу жылына дайындық қалай? Бұл сұраққа аудандық білім бөлімінің басшысы Шолпан Мұстафинова жауап берді. Бөлім басшысының мәліметі бойынша жаңа оқу жылында аудан көлемінде 37 мектепке 4080 оқушы барады. Мектеп табалдырығын алғаш аттап, қолына әліппе алатын 1 сынып оқушыларының саны 405 бала.

- Биылғы 2021-2022 оқу жылының басталуы қалай болады? Мектепке баратын оқушы саны қанша?
- 2021-2022 оқу жылының «Білім күні» іс-шарасы дәстүрлі форматта өткізіледі. Бірінші сынып оқушылары үшін алғашқы қоңырауға арналған салтанатты шарада «Әліппе» және «Букварь» оқулықтары табысталмақ. Барлық жерде өтетін шаралар санитарлық талаптарды сақтай отырып, мектеп алдында таза ауада ұйымдастырылады. Іс-шараға бірінші сынып оқушылары мен ата-аналардың біреуі қатысады. Сондай-ақ, 2-11 сыныптарда 1 қыркүйекте «Білім күніне» арналған Қазақстан Республикасы Тәуелсіздігінің 30 жылдығына орай «Тәуелсіздік жетістіктері» тақырыбында сынып сағаты өткізіледі. Сынып сағаттары әр сынып үшін жеке кабинеттерде және санитарлық талаптар сақталып жүргізіледі.
Оқушылар континенті 4080 баланы құрайды. Ауданның білім беру мекемелерінің желісіне 37 жалпы білім беретін мектеп кіреді. Оның ішінде 21 орта мектеп (9 қазақ мектебі, 11 аралас, 1 орыс), 11 негізгі мектеп (3 қазақ мектебі, 6 аралас, 2 орыс), 5 бастауыш мектеп (2 қазақ мектебі, 2 аралас, 1 орыс) бар.