Көктем - ең әдемі, керемет жыл мезгілі. Бұл мезгіл маған қуаныш сезімін сыйлайды. Көктем – өзгерістер уақыты, жаңа достар және танысулар. Себебі, бұл мезгілде тіршіліктің жаңару кезеңі бас-талады. Қыстың суығы кетіп, қар еріп, жер бетінің көгеретін кезі. Көктемнің белгісі болып есептелетін бәйшешек гүлі шығады. Сол сәттен бастап күн жылынып, шөптер, түрлі гүлдер шыға бастайды. Баулардағы, көшелердегі, үй маңындағы ағаштар бүршік атып, түрлі-түсті гүлдер көздің жауын алады. Дихандар жер жыртып, егін егуге дайындала бастайды.
Қазақстанымыздың шығыс ауылдарында күн жылынып, құстар ұшып келіп жатыр. Олар - табиғаттың керемет тіршілік иелері. Олар болмаса, айналамыз тып-тыныш болып қалады. Құстардың салған әсем әндері де құлаққа жағымды естіледі.
Біздің Самар ауылымызда құстарға жанашырлық танытып, мектеп мұғалімдері мен балалар көптеген ұя жасаумен қамданып жатыр. Ұшып келген құстар жаңа ұяға қонып, балапандарын шығарады, айналаны әуені тамаша әндерімен тербетеді.

Диас Тұрсынбеков, Ж.Болғанбаев атындағы
мектеп-лицейінің 10-сынып оқушысы

2021 жылдың 18 ақпанында Дүниежүзілік азаматтық қорғаныс күнін мерекелеу аясында, Көкпекті ауданының азаматтық қорғаныс гарнизонының №33 өрт сөндіру бөлімінде, Ж.Шайжүнісов атындағы орта мектебінің 5-сынып оқушыларының қатысуымен «Ашық есік күні» өткізілді. Аталған іс-шараны өткізудің негізгі мақсаты азаматтық қорғаныс ұйымдарының беделін көтеру, жас ұрпақтың бойында патриоттық сезімді тәрбиелеу, қарауылдың жеке құрамының күзет қызметін атқаруымен таныстыру болып табылады. Балалар үшін бұл күн ерекше есте қалды, өйткені балаларға өрт сөндіру бөлімі бойынша экскурсия жүргізіліп, қызметтік және тұрмыстық үй-жайлар көрсетілді және өрт сөндіруге арналған автокөліктермен таныстырылды.
Балаларға өрт сөндіруші мамандығы, тұрмыстағы өрт қауіпсіздігі ережелері және өртті байқаған кездегі алғашқы іс-әрекеттер туралы баяндалды.