9 маусымда аудан әкімі Рамиль Сағандыков мектеп түлектері - «Алтын белгі» мен үздік аттестат иегерлері, республикалық және халықаралық олимпиадалар мен жарыстардың жүлдегерлерімен кездесті. Кездесудің ашылу сәтінде аудан әкімі біздің өңірдің тек ауылшаруашылық қана емес, сонымен қатар еліміздің танымал тұлғалары шыққан таланттар мен дарындар отаны екендігін атап өтті.

- Сондықтан сіздерге, жастарға, біз үлкен үміт артамыз. Сіздер біздің еліміздің дамуына зор үлес қосқан белгілі жерлестеріміздің салған сара жолын жалғастыратын боласыздар. Еліміздің үміті - Сіздер! Саналы да сапалы, білімді де белсенді, Отанын сүйетін жастары бар елдің еңсесі әрқашан биік болады. Талбесіктен алған тәрбие мен терең білімнің арқасында тәуелсіз еліміздің тұғырын биіктетіп, келешегін кемелдету жолында аянбай еңбек етеді деп сенемін, - деді аудан басшысы. Ол сондай-ақ биылғы жылғы аудан түлектерінің халықаралық және республикалық олимпиадалар мен байқауларда биік көрсеткішке қол жеткізіп, жоғарғы орындар иеленгендігін тілге тиек етті.

Мемлекеттік рәміздер күні Көкпекті ауданында кең ауқымда аталып өтті. Тәуелсіздік нышанына айналған рәміздер мерекесі барлық ауылдық округтер мен елді мекендерді қамтыды. Барлық жерде бір мезетте мемлекеттік Әнұран орындалып, Туымыз биікке көтерілді. Елтаңба елдігімізді айшықтап, көкірек кернеген ұлттық мақтаныш сезімі ән мен жырға ұласты. Көкпектіліктер әрбір шарада мемлекеттік рәміздер - еліміздің егемендігі мен тәуелсіздігін әлемге танытатын әрі мемлекетіміздің өткені мен бүгінін және болашағы арасындағы сабақтастықтың жарқын бейнесі екендігін айшықтап көрсетті.

Елдіктің белгісіне деген құрмет ерекше. Елжандылық мемлекеттік рәміздерге деген құрметтен басталады. Бұл туралы «Рәміздер - мақтанышым» патриоттық акциясының барасында Жастар орталығының директоры Азат Рахымбаев айтты. «Елбасы Нұрсұлтан Назарбаев  атап өткендей, «мемлекеттік рәміздер хал-қымыздың рухын, озық салт-санасын, қаһармандығы мен даналығын, болашаққа үмітін, арман-тілегін білдіретін ерекше құнды белгілер». Қазіргі таңда қасиетті көк Туымыз, Елтаңбамыз бен Әнұранымыз халықаралық кеңістікте кеңінен танылып, бейбітшілік пен ынтымақтастықтың символына айналғаны сөзсіз», - деді жастар көшбасшысы.

Тәуелсіздігіміз тұғырлы, егемендігіміз еңселі болу үшін біз өз елімізді, туған жеріміз бен Отанымызды ардақ тұтуымыз қажет. Оның ең алғашқы қадамы мемлекеттік рәміздерді құрметтеуден басталады. Жас-тар акциясының аясында аудан орталығына апаратын жол бо-йына мемлекеттік ту орнатылды. Белсенді жастар ту көтеру салтанатында құттықтау сөз арнап, жүрекжарды лебіздерін білдірді. Осылайша елжанды жастардың өнегелі акциясы мерекелік шаралардың бастамасына айналды.

  Мәдениет үйінің алаңында таңсәріден әуезді ән шырқалып, көңілді күй ойналды. «Менің Қазақстаным» атты сурет көрмесі көрермен назарына ұсынылды. Камалбек Кисин, Ратбек Арынұлы, Алтынғазы Оразаев, Құмар Құнапиянов сынды ардагерлер қай жиынның болмасын сәні. Мереке күні құшағын айқара ашып, қуаныса қауышатын қарттардың жүзінен ұлттық құндылықтарға деген зор құрмет, үлкен мақтаныш сезімін байқау қиын емес. Жүргізушілердің әдемі жырмен өрнектелген өлең шумақтары көпшіліктің көкірегіне «Отаным, Елім, Атамекенім» деген қымбат сезім сәулесін құйып, жүрек жылуын сыйлады. Тәуелсіздіктің ақ таңы алаулаған, жүректерді мақтаныш сезімі кернеген бақытты күннің шапағында рәміздердің төл мерекесімен құттықтау лебіздері толассыз төгілді. Әрбір ақжолтай тілек ұлт мерейі ұлықталған күннің маңыздылығы арнасына тоғысты.

- Ту. Елтаңба. Әнұран. Бұл біздің Тәуелсіз ел екенімізді айғақтайтын бірден-бір нышандар. Көгілдір түсті туымыз бен ортасында шаңырақ бейнесіндегі алтын сәулелі күн орныққан Елтаңбамыз және егемен елімізде шырқалған Әнұранымыз бүкіл әлемге Қазақстан Республикасы аталатын жаңа тәуелсіз мемлекет бейнесін паш етті. Егемен елдің әрбір азаматы ресми рәміздерді құрметтеуге, мақтаныш тұтуға тиісті. Елді танытар ұлттық құндылықтар бүгінде төрткүл дүниеге кеңінен танылды. Мемлекеттік рәміздер күні құтты болсын, - деді құттықтау сөз алған округ әкімінің орынбасары Қ.Мұқышев.

Ратбек Арынұлы, ардагер:

- Сан ғасырлар бойы бабаларымыз аңсаған тәуелсіздікке қол жеткізген таңда өз алдына мемлекет болумен қатар, тұғыры биік Туымызбен, ел тарихын әлемге танытар Елтаңбамызбен және кез-келгеннің паттриоттық рухын көтеретін Мемлекеттік Әнұранымызбен айбынды ел бола білдік. Сондықтан да мемлекеттік рәміздеріміз  тәуелсіздігіміздің айғағы деп білемін.

Айжан Жұмадулова, жас маман:

- Тәуелсіз еліміздің кемел келбетіне, берік іргетасына, жол сілтер жарық жұлдызына айналған Мемлекеттік рәміздер туралы толғанып та, тебіреніп те сөйлеу және оларды ерекше қасиет тұту, зор мақтаныш ету - әрбір Қазақстан азаматының ең жоғары парызы. Айтулы мереке күні барлық көкпектіліктерге зор денсаулық, бірлік, тыныштық, ертеңгі күнде сенімділік және туған жерімізге өркендеуді тілеймін! Әр шаңырақта бейбітшілік пен татулық, бақыт пен амандық орнап, біздің ізгі ниеттеріміз бен жарқын істеріміз Отанымыздың игілігіне жеткізсін!

Осы күні сахна биігінен елдің мәртебесін арттыратын, елдік намыс пен абыройды асқақтататын  патриоттық әндер шырқалып, төңіректі жыр-думанға бөледі. Әнұрандай қастерлі әуенді әндер жаңғыра әуелеп, аталмыш күннің мерейін асыра берді. Мемлекеттік рәміздердің құндылығын, оның сырлы үнін, өршіл рухын баршамыздың, әсіресе, бүгінгі жас ұрпақтың терең біліп, сезінгені абзал. Рәміздер - бүгінгі өміріміз, ертеңгі болашағымыз. Тәуелсіздігіміздің басты жемісі, еліміздің қуат-күшінің айқын белгісі!

Дархан БЕРДІБЕК

29 мамыр күні аудан әкімі Рамиль Сағандыковтың төрағалық етуімен аудандық әкімшілік отырысы өткізілді. Күн тәртібінде сүтті мал шаруашылығын дамыту, ағымдағы жылы өткізіліп жатқан жол жөндеу жұмыстары мен жаз уақытында жолдардың күтімі, Ұлы Жеңістің 70 жылдығына арналған шаралардың қорытындысы, елді мекендерді абаттанды-ру туралы қаулының орындалу барысы қа-растырылды. Сонымен бірге, облыс әкімі Д.Ахметовтың қала және аудан басшыларымен өткізген кеңесте берген тапсырмаларының, аудан әкімі хаттамалық тапсырмаларының орындалу барысы бойынша ақпараттар берілді.

Ауданда сүт бағытындағы мал шаруашылығын дамыту мәселесі басты назарда. Дамыту басымдығы нұсқалып отырған салада өзгерістер орын алуда. Бүгінгі күні сүт тауарлы фермаларын ашу мәселесі әрбір округке міндеттелген. – Біз әрбір округте тұрғындардан сүт қабылдау пунктін ашу мақса-тын қойып отырмыз. 1 маусымнан бастап 4 бірдей сүт қабылдау пункті іске кіріседі. «Восток Молоко» серіктестігімен ары қарайғы жоспарда сүтті қайта өндеуге тапсыру мәселесі қарастырылуда, - дейді Марат Қапарұлы. Ауыл шаруашылық және ветеринария бөлімінің басшысы өз баяндамасында бүгінгі күні ауданда сүт бағытындағы мал шаруашылығын дамыту бойынша жүргізілген жұмыстарға тоқталып, бұл тұрғыда алға қойылған жоспарлар сәтті жүзеге асатынына сенім білдірді.

Көкпекті ауданының мемлекеттік қызметкерлері мемлекеттік тілді меңгеру деңгейіне тест тапсырды. Шығыс Қазақстан лингвистикалық тіл оқыту орталығы мен ҚР Ұлттық тестілеу орталығы бірлесіп өткізген сынаққа 46 мемлекеттік қызметкер мен халыққа қызмет көрсету саласының өкілдері тартылды. Тест қорытындысы Елордада сараптан өтпек.

Шара барысында облыстық лингвистикалық оқыту орталығының директоры Бақыт Ағажаева тестілеудің мәнісіне кеңінен тоқталды.

- ҚазТест жүйесі Қазақстан Республикасының азаматтары мен еліміздің аумағында қызметін жүзеге асыратын шетел азаматтарының мемлекеттік тілді білу деңгейін бағалаудың отандық жүйесі. Шағын және ұзақ диалог, қысқа монологтарда және есту арқылы түсінгенін анықтауға, грамматиканы, лексиканы пайдалана білетіндігін анықтауға арналған тапсырмалардан тұрады. Алуан мазмұнды, түрлі стильді мәтіндер мен соларды оқу барысында түсінгенін тексеруге арналған тапсырмалар қарастырылған. Тіл меңгеру деңгейлеріне байланысты шығармашылық диктант, мазмұндама және ұсынылған тақырыптар бо-йынша эссе жазу жұмыстары жүргізіледі. ҚазТест төрт бөліктен тұрады: тыңдалым, лексика-грамматикалық бөлік, оқылым, жазылым - деп біздерге түсініктеме беріп өтті.

Астанадағы ұлттық тестілеу орталығының өкілі Ержан Мұқанов - ҚазТест жүйесінде тілдік білімді бағалаудың деңгейлік жүйесі – қарапайым, базалық, орта, ортадан жоғары, жоғары, жетік деңгейлері негізге алынды. Ал бүгінгі тестілеуге қатысушылардың нәтижелері жақсы болса  В 1 - орта деңгейді меңгерім сертификатын алады. Ал тест жұмысының нәтижесі 3 аптадан кейін анық болатын болады - деп ойымен  бөлісті.

Аталған іс-шара арқылы мемлекеттік қызметкерлердің қазақ тілін қолдану және іс-қағаздарын мемлекеттік тілде жүргізу дәрежесін анықтау көзделіп отыр. Тестілеу нәтижелері аудандағы тіл оқыту орталығы жұмысына берілген баға болмақ. Осыған дейін 3 мәрте өткізілген ҚазТест сынағынан көкпектіліктер мүдірмей өтіп, жақсы көрсеткіштер анықталғанын ескерсек, бұл жолы да оңды нәтижеге үміт артуға әбден болады. Мемлекеттік тілдің мәртебесін мемлекеттік қызметкерлер осылайша асқақтатып жатса қуанышты әрине.

Дархан БЕРДІБЕК