Біз лагерьге барамыз.

Бар дауыспен әнге салып,

Лагерь жырын айтамыз, - деген ән жолдарында айтылғандай, маусымның отызы мен  шілденің оны аралығында балаларға арналған «Балдырған» мектеп жанындағы сауықтыру лагерінің  үшінші маусымы да өте шықты.

Оқу жылының төрт тоқсаны бойы мектептердегі оқу еңбегімен шұғылданған, тапжылмастан партада отырып, ұстаздарының берген тәлім-тәрбиесі мен пәндердің түр-түрінен мағлұмат алып, ақыл-ойын кемелдендірген балалар үш айлық жазғы демалысты асыға күтетіні рас. Жаз бойы асыр сала ойнайтын олар үшін жаңа оқу жылына бойларына мол күш-қуат жинап, сағына күткен мектебі мен сыныптас достарымен қауышудың орны тіптен бөлек екендігі де анық.

Қазіргі таңда еліміздің барлық аймақтарында балалардың жазғы демалысын қызықты да мағыналы етіп өткізу, олардың бойындағы бар өнерлерін дамыту, бір-бірімен достық қарым-қатынас орнату, басқа да адамгершілік қасиеттерін шыңдау мақсатында табиғаты көркем жерлерде балғындардың  демалысына қолайлы жағдайдың бәрі жасалған.  Сондай-ақ, мектеп жанындағы балажайлар да өз жұмыстарын бірнеше ауысымда жүргізіп, оған ең алдымен көп балалы отбасылар мен толық емес және тұрмысы төмен отбасының балалары қамтылған. Лагерьге келуші балалар таңғы және түскі аспен, тегін ыстық тамақпен қамтамасыз етілді. Алғашқы күннен-ақ лагерь меңгерушісі мен тәрбиешілердің  және балалардың ойластыруымен топтың атын таңдап, ұранын құрастырдық.  Демалушылар лагердің ережесімен таныстырылып, он күннің ішінде жоспарға сәйкес әртүрлі  іс-шаралар өткізілді. Атап айтсақ,  «Лагерьдің ашылу салтанаты», «Салауатты өмір салтын қалыптастыру», «Ертегілер еліне саяхат», «Өскенде кім боламын?» шаралары, Астананың туған күніне орай сурет байқауы ұйымдастырылып, өлең оқудан сайыс және концерттік бағдарлама қойылды. Ең соңғы лагердің жабылу күнінде оқушылар«Талменка» өзенінің бойына туған жердің табиғатын тамашалауға шықты. Міне, осылайша балғындар өткізілген қызықты  іс-шараларға белсене қатысып, жақсы көңіл-күйде болып, он күннің қалай жылдам өте шыққанын да байқамай қалды.

Ж.Байжұманова, Преображенка орта мектебі

Жазғы демалысты жоғары дәрежеде ұйымдастыру үшін барлық сала бойынша мониторинг жүргізіліп, бағыттар анықталды. Жаз уақытында 20 орта мектепте, 12 негізгі мектепте, 6 бастауыш мектепте мектеп жанындағы тамақтандырылған және спорттық-сауықтыру, туристік, дебаттық бағыттарында жұмыс істейтін лагерьлер, қызығушылық үйірмелер балалардың еңбегі мен демалыс режиміне қолайлы орында денсаулығын нығайтып, өздерінің қабілеттерін іске асыру жағдайында тынығып, шындалуға мүмкіндік туғызылып, 1-10 сынып оқушылары түгелдей қамтылды. 2014 жылы лагерьлерде аз қамтылған отбасынан шыққан  - 1174;  көпбалалы отбасынан шыққан - 748; жетім және ата-анасының қамқорлығынсыз қалған - 55; патронаттық тәрбиедегі - 3, қиын және сенімсіз топтағы балалар - 41 (5 ІІБ тіркеудегі, 36 мектепішілік тіркеудегі), мүмкіндігі шектеулі 37 (мектеп жанындағы лагерьлер) бала жазғы сауықтырумен толық (100 %) қамтылды. Аталған аз қамтылған және көпбалалы отбасынан шыққан, жетім және ата-анасының қамқорлығынсыз қалған, патронаттық тәрбиедегі оқушылар жазғы сауықтыру және мектеп жанындағы лагерьлерінде «Жаппай оқу» қорының есебінен демалды, қалған оқушылар ата-аналар, демеушілер есебінен демалды.

Новостройка ауылындағы «Балауса-Көкпекті» спорттық-сауықтыру кешені екі ауысымда 80 баланы демалдырды, ІІІ ауысымда 13 шілде 24 шілде аралығында  40 бала демалып жатыр. Аталған кешенде екі ауысымда әлі 80 бала демалады. Сарыбел ауылындағы «Жас толқын»   дебаттық, Миролюбовка ауылындағы «Достық» спорттық-сауықтыру лагерьлерінде бірінші ауысымда 60 бала демалды, екінші ауысымда 60 бала демалып жатыр. Көкжыра ауылындағы «Жас өркен» спорттық-сауықтыру лагері екі ауысымда 60 баланы қабылдап, өз жұмысын аяқтады. Мойылды ауылындағы «Тау самалы» спорттық-туристік лагері екі ауысымда 50 баланы демалдырды және қосымша тағы бір ауысым жұмыс істеп, (14.07-25.07), 25 бала демалып жатыр.

Сонымен қатар, Шығыс Қазақстан облысы білім басқармасының «Жаз аралығында оқушылар тобымен алмасу» жобасының аясында 2014 жылғы 29 маусымнан шілденің 3-і аралығында Преображенка орта мектебінің 6 оқушысы, Үлкенбөкен мектеп-балабақша кешенінің 7 оқушысы Күршім ауданындағы лагерьде демалды. Көкпекті орта мектебінің 1 оқушысы Алматы облысының Қаскелең қаласындағы «Таң» атты жазғы сауықтыру лагерінде демалып жатыр.

Жазғы демалыс кезінде мектеп оқушыларын туристік маршруттар бойынша тарихи орындарға топсеруенге шығару кестелері әзірленді. Атап айтқанда: Астана қаласына, Өскемен қаласындағы этноауылға, Қалбатау ауылынан 7 шақырым орналасқан «Ер Жәнібек» монументіне, Ұлан ауданындағы «Сібе» көліне, Қарауыл ауылындағы Жидебай, Бөрлі мұражайларына  оқушылар баруда.

Ш.Мұстафинова, білім беру бөлімі басшысы