Еліміздегі басты мерей-тойлардың бірі - Қазақстан халқы Ассамблеясының 20 жылдығын атап өтуге санаулы күндер ғана қалды. Бүгінде мемлекетімізде жүз отыздан астам ұлт пен ұлыс өкілдері бірлік пен ынтымақта тату – тәтті өмір сүруде. Осындай жандардың арасында бір-бірімен көңілі жарасқан интернационалды отбасылар да аз емес. Бір шаңырақ астында бейбітшілікте қазақтың әдет – ғұрпын берік ұстанған от-басының бірі – Көкпекті ауы-лында тұратын Гусейновтар әулеті.

Минижиан Гайфутдиновна татар қызы. Өмірлік жан жары - Гусейн Свооглының ұлты әзербайжан. Жастарды Көкпекті ауылы таныстырып, табыстырған.

Бүгінде әже болып отырған Минижиан 1953 жылы Көкпектіде дүниеге келген. Мектеп бітірген соң Семейдегі педагогикалық институттың физика-математика факультетін тәмәмдап, 42 жыл Көкпекті орта мектебінде ұстаздық қызметте болған. Ал, Гусейн ата 1951 жылы Азербайжан республикасының Ленкоран қаласында дүние есігін ашқан. 1972 жылы Көкпектіге көшіп келгеннен кейін құрылыспен айналысқан. Сол қызметте жүрген кезінде өмірлік жан жолдасы Минижианды кездестіріп, бірден ұнатқанын бізге майда қылжақпен баяндап берді. – Біз кемпіріміз екеуміз 1973 жылдың 5 желтоқсанында таныстық. Бір көргенннен ұнаттым. Осы қызбен шаңырақ көтеруге бел байлап, 1974 жылы наурыз айында отбасын құрадық. Содан бері, міне, қанша жыл өтсе де тату-тәтті ғұмыр кешудеміз. Үш қыздың әкесімін. Бейбітшілігі жарасқан елім, кең байтақ жерім бар. Сондықтан менен асқан бақытты жан жоқ! – дейді Гусейн ата.

Отасқан жылдарын ғана емес, тіпті танысқан күндеріне дейін естерінде сақтаған екі қарттың махаббатына таң қалмасқа амалың жоқ. Осындай ғашықтық сезімнің нәтижесі - раушандай жайқалған үш қызы. Бүгінгі күні қыздары бір-бір шаңырақтың түтінін түтетіп отырған үлгілі ана. Үлкен қызы Адия орыс жігіті Николаймен шаңырақ көтеріп отбасымен Павлодар қаласында. Ортаншы қыздары Мадина Серік есімді қазақ жігітіне тұрмысқа шығып, Семей қаласына қоныc тепкен, кенжелері Альфия әкесі қазақ анасы орыс, яғни ұлты қазақ Анатолий есімді жігітпен отбасын құрып, Көкпекті ауылында тұрады. Аталған қыздарынан асыл сүйекті қарттарымыз 8 немере сүйіп, солардың қызығын көріп отыр.

Біздің елдегі бірлік пен қоғамдық келісімнің баста-уы - Қазақстан халқының ор-тақ тарихы. Ғасырлар бойы тағдыр талайына ұшыраған халықтарды құшағына сыйдыра білген қасиетті Ұлы Дала көптеген ұлыс пен ұлттың құтты қонысына айналды. «Бақ та, тақ та таласқанға бұйырмайды, халықтық істе жарасқанға бұйырады» деген дана бабаларымыз. Көкпекті жерін мекендеп жатқан интернационалды отбасылар соның бірден бір айғағы десе де болады. Махаббат толқынында бірге жүзген қарттарға мықты денсаулық пен ұзақ ғұмыр тілейміз.

Жанерке АБЫЛХАН

9 cәуір күні аудан әкімінің міндетін атқарушы Рамиль Сагандыков республикалық олимпиада жүлдегері Анна Роздоминаны қабылдады. Мемлекеттік тілді жетік меңгерген озық шәкіртті айтулы жеңісімен құттықтай отырып, Рамиль Нығметжанұлы алдағы уақытта Аняны тек қана биік шыңдардан көретінімізге сенім білдірді. Кездесу барысында аудан басшысы дарынды оқушыларға үнемі қолдау көрсетіп отыру қажеттілігіне баса назар аударды.

Көкпекті орта мектебінің 10 сынып оқушысы, оқу озаты Анна Раздомина жақында республикалық олимпиаданың облыстық кезеңінде қазақ тілі пәнінен жүлделі І орынға ие болып, республикалық кезеңге жолдама алған болатын. 24-29 наурызда Атырау қаласында өткен республикалық олимпиадаға қатысып, ҚР Білім және Ғылым Министрлігінің ІІ дәрежелі дипломымен және күміс медальмен марапатталды. Дарынды қыздың бұл жетістігі, әрине аудан мәртебесін Республика көлеміне көтерді десек артық айтпағанымыз. Аняның жеңісіне оның тәрбиеленіп өсіп келе жатқан ыстық ұясы Көкпекті балалар үйіндегі тәрбиешілерінің де төбелері көкке жеткендей болғаны рас.

Сондай-ақ, талапты қыздың қазақ тілін жетік меңгеруіне ықпал жасап, білім нәрімен сусындатқан ұстазы М.Құрманғалиеваға шәкіртінің алғысы шексіз. Ұстазының үмітін ақтап, жеңіспен оралған дарынды қызға Көкпекті орта мектебінің демеушісі Бекбердинова Шолпан Майданқызы бағалы сыйлық ұсынып, қолдау көрсетті. Мектеп директоры Аслан Танысбаев пен мектеп ұстаздары демеушілік көрсеткен жомарт жандарға алғыстарын білдіріп, білім шыңының биігінен көрінген Аннаға болашақта шығармашылық табыс тіледі.

Ж.Қарымсақова, қазақ тілі мен әдебиеті пәні мұғалімі