Жаңа оқу жылы қарсаңында ауданның білім беру қызметкерлерінің дәстүрлі педагогикалық кеңесі өтеді. Тамыз кеңесінде Көкпекті ауданының Білім беру бөлімі басшысы Ш.Мұстафина «Білім берудің инновациялық стратегиясы – мемлекеттік қоғамның және жеке тұлғаның тұрақты даму факторы» атты тақырыпта баяндама жасайды. Көпшілік оқырманға баяндама тезистерін ұсынамыз.  Баяндамада 2013-2014 жылы атқарылған жұмыстардың қорытындысы мен алдағы жылдарда атқарылатын жұмыстың мақсаттары мен міндеттері айтылды.

Жаз жайнатып, күн күлдіріп, біз лагерьге барамыз,-деп оқу жылы аяқталысымен мектеп оқушылары жазғы лагерьге баруға асығады. Жайраңдаған жаздың қуаныш пен шаттыққа толы ұмытылмас естеліктері балалардың осындай жазғы демалыс лагерінен бастау алары сөзсіз.

Жазғы балажай балалардың жазғы демалысында денсаулығын нығайтып, дене тәрбиесін шыңдап, күш жинауға, білімін толықтырып, жаңа әсер алуына ықпал жасайды. Осы мақсатта ұйымдастырылған Көкпекті орта метебіндегі «Солнышко» мектепалды лагері 2маусым күні өз есігін айқара ашты. Төрт маусымнан тұратын балажайдың алғашқы кезеңі қызыққа толы, түрлі ойындармен балаларға қуаныш сыйлады.

Маусымның әр күнінде мерекелік және балалар денсаулығын жақсарту бағытындағы іс-шаралар, спорттық жарыстар мен ойындар ұйымдастырылады. Лагерьде балалар демалысының басы-қасында жүрген мұғалімдер әр балаға ерекше ықылас бөліп, олардың сабақ барысында ашылмаған жаңа қырынан танылуына, мұғаліммен, оқушылармен достар боп сырласуына қажетті барлық жағдайды жасауға тырысып бақты. Мәселен, әр топта ойын-сауықпен қатар әр-түрлі спорттық ойындар, психологиялық тренингтер, дәрігер тарапынан медициналық таза ауада өткізілетін гимнастикалық жаттығулар,экскурсия мен серуендер үнемі өткізіліп тұрды. Ал, балалардың достық қарым-қатынасы, азаматтық сезімдерінің қалыптасуы үшін лагерьде жорықтар, көңілді кештер өткізілді. Лагерьге келген оқушылардың денсаулығынмектеп медбикесі күнделікті тексеріп,олармен сауықтыру іс-шараларын жүргізді.Балалардың сапалы тамақтануы да назардан тыс қалмай, тағам мәзірі жіті қадағаланды.

Күндерін таңертеңгі жаттығудан бастаған балалардың демалыстарын тиімді әрі қызықты ұйымдастыру бағытында жұмыс жоспары жасақталып, әр күні әр тақырыпта шаралар өткізілді. Атап айтқанда, "Көрікті менің ауылым!", "Денің сау болсын десең...", "Жаңылтпаштан жаңылмас, жұмбақ айтып жарыстырар", "Жаз аруы-2014", "Жігіт сұлтаны", " Ертегілер еліне саяхат" , "Мемлекеттік рәміздер-ұлттық мақтанышым" т.б танымдық сағаттарға балалардың барлығы белсене қатысты. Сайыстардан орын алған балалар мақтау қағаздарымен және естелік сыйлықтармен марапатталды. Балалар, сондай-ақ мұражайға, спорт кешеніне, саябаққа барып, әсем табиғатты тамашалады. Балалардың жазғы демалысы қауіпсіз түрде өтуі мақсатында Көкпекті аудандық төтенше жағдайлар бөлімінің әдіскері С.Тілебалдин және жол полиция қызметкері А.Зарықпаев балалармен кездесу өткізіп, қауіпсіздік ережелері бойынша нұсқаулықпен таныстырды. Кездесу барысында оқушылар ағаларының айтқан ескертулерін мұқият тыңдап, ойға түйіп алды.

Бұл лагерьде балалар демалумен қатар білім көкжиектерін кеңейтіп, шығармашылыққа бейімделеді және денсаулықтарын нығайтады.

-Жыл сайын әр ауысым бойынша әлеуметтік жағынан аз қамтылған отбасының балалары лагерьдің белгіленген кестесіне сай демалады. Балалардың бос уақытын тиімді әрі қызықты ұйымдастыру бағытында жұмыс жоспары құрылып, шаралар өткізіледі. Балалар таза ауада шынығып қана қоймай, туған өлкеміздің ғажап табиғатымен және тамыры терең тарихына қанық болады. Олардың бойынаадамгершілік қасиеттерді сіңіру –біздің басты мақсатымыз,-дейді Көкпекті орта мектебі директорының міндетін атқарушы Шолпан Ғабдуллина.

Балалардың әр күнін көңілді өткізуге атсалысып жүрген мектеп директорының тәрбие ісі бойынша орынбасарының міндетін атқарушы, бастауыш сынып және денешынықтыру пәні мұғалімдерінің, медбикенің, дәмді ас мәзірін даярлайтын аспазшылардың еңбегі зор екендігі анық.

Балалардың жүрегіне ізгілік пен қуаныш сыйлай ашылған жазғы «Солнышко» демалыс лагерінде демалушылар бос уақыттарын мағыналы өткізіп қана қоймай, белгілі бір бағытта білімдері мен қабілеттерін жетілдіріп қайтқаны сөзсіз.

Раушан Қанапиянова,

Көкпекті орта мектебінің мұғалімі