«Рухани жаңғыру» бағдарламасы аясында аудандық «тарихи - өлкетану» мұражайына саяхатқа бару кестесіне сәйкес 15 қазан күні қазақ тілі мен әдебиеті пәнінің мұғалімі Ермек Нұрланның жетекшілігімен 8 - сынып оқушылары саяхатқа шықты. Қазақстан журналистер одағының мүшесі ақын, өлкетанушы Қайрат Малғаждаровпен бірлесіп, маршрут бағыты бойынша бірінші кезекте таңбалы тастарға барды. Жергілікті өлкетанушы Қайрат Қапайұлы оқушыларды таңбалы тастардың тарихымен таныстырды. Балалар таңбалы тастар жайлы толық ақпарат алып, естелікке суретке түсті.
Маршруттың келесі бағыты Көкпекті ауылындағы «Ұлы дала елі» алаңында орналасқан Абылайхан және Бармақ Батыр ескерткіштері болды. Қайрат ағамыз қазақ батырларының өмірбаяны және ерліктерімен таныстырып өтті. Экскурссия бағытының соңғы бөлімі бойынша аудандық «тарихи - өлкетану» мұражайы болды. Мұражайға саяхат жасау кезінде оқушылар мәдени мекемедегі көне жәдігерлер, тарихи тұлғалар мен соғыс ардагерлеріне арналған бөлмелермен таныстырылды. Оқушылар өздеріне көптеген мағлұмат алып, жақсы әсерде қайтты. Өлкетану бағыты бойынша оқушыларға экскурссия барысында толық мәлімет беріп, тың ақпаратпен таныстырған өлкетанушы, журналист Қайрат Малғаждаров ағаға мектеп ұстаздары мен оқушылары алғыстарын білдіреді.

Абай атындағы
мектеп – балалақша кешені

Самар орталық кітапханасында Тәуелсіздіктің 30 жылдығы мен алда келе жатқан Тілдер күніне орай «Ең қымбат қазына - тіл» атты кітап көрмесі ұйымдастырылды. Көрмеде қазақ тілінің тарихынан сыр шертіп, тілдің қазіргі уақытқа дейінгі зерттелуі, дамуы жайында баяндайтын кітаптар назарға ұсынылды. Көрме мақсаты – жастар мен балаларды кітап оқуға шақыру, кітап арқылы жан–жақты болуға, уақыттарын тиімді пайдалануға талпындыру.
Тіл – ең ұлы қару. Тіл – ең асыл құндылық. Тіл – ең керемет қатынас құралы. Қазіргі таңда ана тіліміз дамып, сөйлеушілер саны жылдан – жылға артып келеді. Тіл байлығын арттырудың бір ғана жолы бар, ол - әдеби кітаптарды көбірек оқу. Бір жылда бір-екі кітап деген өте аз, кемінде аптасына бір кітап оқысаңыз нәтижесі бірден біліне бастайды.

Самар Орталық кітапханасы

Тассай ауылдық округінде «Тассай ауылына кіреберіс» 9 шақырым көлеміндегі тасжолда орташа жөндеу жұмыстары жүргізілуде.
Өңірлерді байланыстыратын күре жолдың да, ауыл - ауылға қатынайтын қара жолдың да жанға жайлы болғаны қандай жақсы. «Жол азабын жүрген біледі» дегендей, Тассай ауылындағы шешімін күткен күрделі мәселелердің бірегейі автокөлік жолдарының жайы болатын. Ал, бүгінде көпшіліктің қабырғасына аяздай батқан Тассайдағы осы бір түйткілдің түйіні біртіндеп шешіле бастаған сыңайлы.
Жолдарды қалпына келтіру және оны күрделі жөндеуден өткізу аса өзекті мәселе болып табылады. Көптеген дамыған елдерде жолдарды жаңғырту және инфрақұрылымға инвестициялар қажеттілігі бұрыннан дамудың негізгі факторларының біріне айналды. Бұл жерде ең алдымен жолдарды жөндеу, сондай - ақ қолданыстағы жол желісін кеңейту және жетілдіру туралы сөз болып отыр. Әрине, ерте ме, кеш пе жолдың нашарлап, жүруге жарамай, жөндеу жұмыстарын талап ететіні белгілі. Тассай жолы үшін бұл жұмыстарды орындау маусымы бірнеше жыл бұрын келген болатын. Алайда, осы уақыт ішінде мәселе тек пікірталастар мен ұсыныстар деңгейінде ғана қалып келді. Қазіргі уақытта аудан әкімі Раджан Сейтқановтың тікелей атсалысуымен жағдай өзгерді. Мемлекеттік сатып алу конкурсына сәйкес мердігер "ОблШығысЖол" ЖШС болып танылды. Жоба сомасы 223 414,444 мың теңгені құрайды. Техникалық қадағалауды "Arrive” ЖК жүзеге асырады. Ағымдағы жағдай туралы білу және мердігермен тікелей сөйлесу үшін біз жобаның тапсырыс берушісі "ТКШ, жолаушылар көлігі және автомобиль жолдары бөлімі мамандарымен бірге жоба атқарылып жатқан жерге барып, жұмыс барысымен танысып қайттық.

Үлгілімалшы ауылдық округіне қарасты Мамай ауылындағы қарапайым қазақ жастарының ауыз біршілігі мен береке-бірлігінің арқасында өз туған, туып-өскен ауылдарына бір адамдай қаражат жинап, миллион тенгенің көлемінде кіре берісіне арка орнатты.
Осындай жанашыр жүрегі ауыл деп соғатын азаматтар қатары көп болса нұр үстіне нұр болар еді. Кішкентай ғана ауыл мал шаруашылығымен айналысып, еңбекқор жастар өз шаруаларын дөңгелетіп ауылға деген қамқорлықтарын көрсетіп, мәрттік жасады. ұлттық спортың түрлерін дамытуда Мамай жастарының үлесі зор. Әсіресе ұлттық ат спорт түрлері соңғы жылдары ауылда қайта жаңғырып келеді. Көкпар мен бәйге ұлттық ойындары жастардың көп қызығушылығын тудыруда.
Мамай ауылының жастары футбол ойынынан да аудандық жарыстарда топ жарып жүр. Шағын ауылдың ұйымшыл жастары осылайша спортты жанына серік етіп, ауыл намысын қорғауда. "Жас келсе іске" дегендей ауылдың бір топ жастарының өз күштерімен игі бастаманы қолға алғандарына мың алғыс білдіреміз.

Ауылдық округ әкімдігінің ақпараты