7-10 желтоқсан аралығында ауданымызда коронавирус инфекциясын жұқтырудың жаңа жағдайы тіркелді.
Көкпекті аудандық тауарлар мен көрсетілетін қызметтердің сапасы мен қауіпсіздігін бақылау басқармасы ұсынған мәлімдеме бойынша індеттің 5 жаңа жағдайы тіркелген. 3 науқаста коронавирустық инфекция белгілері болса, 2 науқаста симптомсыз түрі анықталған.
Бұл жаңа жағдайлар Самар, Көкпекті, Теректі, Көкжайық, Биғаш ауылдық округтерінде тіркеліп отыр.
Науқастармен байланыста болған адамдар анықталып, олардың барлығынан коронавирусқа ПТР-талдаулар алынды.
Аудан тұрғындарына коронавирустық инфекцияның таралуына жол бермеу үшін барлық сақтық шараларды қатаң сақтауларын сұраймыз!

Ауыл тұрғындары арасында ауру жағдайларын алдын алу мақсатында барлық аудан аумақтарында маска тағу тәртібі мен әлеуметтік қашықтық сақтау маңыздылығы туралы күшейтілген ақпараттық-түсіндіру жұмыстары жүргізіліп жатыр.
Көкжайық ауылдық округінің әкімі Қ. Ахметқалиевтің басшылығымен арнайы топ дүкендерді аралап, маскалық режим және азық-түлік бағасын тұрақтандыру туралы түсіндіру жұмыстарын жүргізді. Және ауылда тұратын 65 жастан асқан қарттарға волонтерлер көмек көрсететіні туралы хабардар етілді.

1 қараша күні ауданымызда денсаулықты дамыту мемлекеттік бағдарламасын іске асыру мақсатында жылжымалы медициналық кешен әкелінді. Бұл кешен облыстың шалғай аудандарындағы ауыл тұрғындарын тексеруге бағытталған.
Жылжымалы медициналық кешен туралы ШЖҚ КМК Көкпекті аудандық ауруханасының баспасөз хатшысы, дәрігер-эпидемиолог Е.И. Сорокина егжей-тегжейлі айтып берді. Жылжымалы медициналық кешен - ең заманауи жабдықтармен: гинекологиялық тексеру аймағы, рентген және флюорография бөлімі, жалпы қабылдау, жалпы практика дәрігері кабинеті, зертханалық диаг-ностика, функционалдық диагностика аймағымен (УДЗ, ЭКГ) жабдықталған. Аталған кешен Қостанайдағы «СарыарқаАвтоПром» зауытында өндірілген.

Қазақстанның бірнеше облысында құс тұмауының өршуі тіркелген, ал Шығыс Қазақстан облысында ауру жұқтыру жағдайы тіркелген жоқ. Ауру айтып келмейді десек те, оның алдын алу – өз қолымызда.
Біз Қазақстан Республикасы ауыл шаруашылығы министрлігі Ветеринариялық бақылау және қадағалау комитетінің Көкпекті аудандық аумақтық инспекциясының басшысы Е.А.Сарсенбаевпен құс тұмауы деген не және одан қалай қорғану керек деген сұрақтар төңірегінде сұхбат жүргіздік.

Құс тұмауы қандай ауру?

- Құс тұмауының вирустары жабайы және үй құстарында кездеседі. Үй құстары құс тұмауымен ауырған жағдайда ауру жасырын түрде өтіп, көп өлім-жітімге ұшыратады. Құстар ауырғанда тәбеті жоғалып, жемнен бас тартады, бұлшық еттері жансыздануына, яғни параличке ұшырауына байланысты қанаттары салбырап, жүргенде шатқаяқтап, сүріне береді. Мойыны салбырап, бастары 180 градусқа бұрылып кетуі де мүмкін, тамағы мен айдары ісініп, көкшіл тартады, мұрындарынан су ағып, түшкіре береді.