Екі жұлдыз,

Екі бақыт көктегі

Төбемізде тұрып алды кетпеді

Бар аспаннан екі жұлдыз көрдім мен

Біздер де екеу едік сәулем, өйткені - деп, бұл ән Үлкенбөкен орта мектебінің төрінде шырқалды. Бұл жобаны ұйымдастырушы жас ұстаздар: Рыскүл Көбелдесова, Альмира Толқамбаева, Назерке Қанағатова мектеп ұжымының алғысына бөленді. Себебі жобаның сценариін құрып, оған жұптарды таңдап, оны ұйымдастырып, жоғары деңгейде жүргізу әркімнің қолынан келмейді. Үш ұстазымыз да тіл мамандары. Жобаға әділ де қатал әділқазы алқалары сайланды. Олар: мектеп директоры Айсұлу Егеубаева, ардагер ұстаз - Лилия Осипова, бастауыш сынып мұғалімі- Бибінұр Сүлейменова.

Жоба үш кезеңнен тұрды. Бірінші кезең қараша айының соңында өтті. Бұл кезеңде 80-90 жылдардағы хит әндерді айту жобаланды. 9 жұп та сол жылдарға сәйкес киініп, ән таңдап дайындалып келген. Жобада әділқазы алқаларымен бірге көрермендер де ұнаған жұпқа өз дауыстарын берді. I – кезеңде ұпай саны аз 3 жұп жобадан шықты. Әділқазылар тарапынан да ән сол жылдарға сай емес немесе жұп байқалмады, әркім өзі үшін күресті деген сындар айтылды.

Екінші кезең тәуелсіздік күніне орай өткізілді. Бұл кезеңдегі тақырып Ұлы Отан соғысының 70 жылдығы - патриоттық әндер орындалды. Мектебіміздің тәрбие ісінің меңгерушісі С.Тоқтамысова мен дене шынықтыру пәнінің мұғалімі Б.Растриганың орындауында «Ауылым» әні, мектебіміздің математика пәнінің ұстазы Ш.Камерия мен география пәнінің мұғалімі А.Мұстафинова, информатика пәнінің мұғалімі А.Қыдырбаев пен мектеп іс-қағаздарын жүргізуші Р.Насивханның орындауындағы «Көк тудың желбірегені» әндері көптің көңілінен шықты. Осындай кереметті тамашалаған ұстаздар қауымының көңіл-күйін айтып жеткізу мүмкін емес.

Бұл кезеңде  де 3 жұп келесі кезеңге жолдама алмады.

Үшінші кезең Жаңа жылға қарсы ұйымдастырылды. Бұл кезеңде 3 жұп қалды. 1, 2, 3 орынға таласты. Жоба шарты бойынша екі ән айтылуы керек болды. Бір ән өздерінің таңдауы бойынша, екінші ән Жаңа жыл мерекесіне орай өткендіктен «Жаңа жыл» туралы ән айтылды.

«Екі жұлдыз» жобасының 3 –ші кезеңін ұйымдастырушы қыздарымыз Рыскүл, Альмира, Назеркенің «Жаңа жыл» әнімен басталды. Шынарбек Камерия мен Аяулым Мұстафинованың орындауындағы лирикалық ән мен «Жігіттер» квартетінің репертуарынан алынған «Жаңа жыл» әні шырқалғанда ұстаздар вальс айналып, би билеп шаттыққа бөленді.

Нәтижесінде «Екі жұлдыз» жобасының жеңімпазы болып Аяулым Мұстафинова мен Шынарбек Камерия, екінші орынға С. Тоқтамысова мен Б. Растрига, үшінші орынға Арман Қыдырбаев пен Рая Насивхан ие болды. Қатысқан 9 жұп түрлі номинациямен және сыйлықтармен марапатталды.

 С.Сұлтанғұлова , Үлкенбөкен мектеп – балабақша кешені

Желтоқсанның 27 жұлдызында Тассайда соңғы 3-4 жылда дәстүрлі түрде өткізіліп келе жатқан «Мүмкіндігі шектеулі» балалар үшін «Жаңа Жыл Шыршасы» атты мереке биыл да жоғары деңгейде аталып өтті.

Шыршаны айнала шуылдап,сақ-сақ күлісіп, тақпақ айтысып Аяз Атамен Қарша Қыздың қоржынынынан сыйлықтар алып рахат күйге түскен, түрлі ертегі кейіпкерлерінің бейнесіне кіріп, ойындар ойнап шаттанған балаларымен бірге қуанған аналарының да жанары нұрланып, риза кейіпке енген. «Мүмкіндігі шектеулі»- деп ресми айтылса да табиғат-ананың адамзат баласына сыйлаған ерекшелігі көп қой.

Анар есімді қыз баланың мың бұрала билегені, Әсем атты балауса қыздың өзі жазған өлең шумақтары ойлы, мағыналы мәтінімен сөз танитын кісіні таңдандырып қана қоймай ынтықтырады екен. Сөз патшасының құдіреті керім! Шырша мерекесінің соңына қарай барлық маска кигендермен қатар I- II және III орындарға сондай-ақ, жеке өнер көрсеткен өнерпаздарға түрлі сыйлықтар үлестіріліп, барлығына тәттілер толтырылған Жаңа Жылдық дорбаша табыс етілді. Балаларға арнап мейрам құрметіне жеміс-жидектер мен сусындар қойылған дастархан да жайылды. «Бір бала қуанса, мың періште қуанады»-дейтін бабамның сөзін осындай ісімен растай Шырша тойына қолдау көрсетіп қолтықтан демеген, ауылымыздың білікті кәсіпкерінің бірі Айтжамал Оразбаеваның өзі де болып балалармен аналарға құттықтауын жолдады.

Жаңа Жыл құтты болсын! Бастысы балалар қуанды!

Желтоқсанның 30 жұлдызы.

Заманына сай адамы демекші, өркениеті өрге басып келе жатқан еліміздің шалғайда жатқан пұшпағы, ат төбеліндей ауылдың да өзгеге өнеге болар дәстүрлері де күн сайын көбейіп келеді. Қызыл шапан жамылып, қызыл қоржын артынып, ақ таяғын таянған Аяз Ата мен Ақша Қар қыз Тассай ауылында өткен «Жылқы жылы» дүние есігін ашқан бүлдіршіндерді іздеп сапарға шықты. Іздегендері табылды.

Жиырма алты үйге ат басын тіреп, періштедей пәк, құйтақандай ғана адамзат ұрпағын аппақ торсықтай шекесінен өбіп, тұңғыш көрген Жаңа Жылымен құттықтап тілек айтып, ауылдағы ақ көңіл апаларының қоржын тола сәлемдемесін беріп қайтты.

Желтоқсанның 31 жұлдызы

Жұмыр жердің жарымынан астамы тойлап жатқан Жаңа Жыл мерекесі Тассайға да жетті ау. Қызылды-жасыл киінген, шадыман жұртта есеп жоқ. Жайраң қаққан жарқын жүздер, айқара құшақтасып бір-біріне ыстық лебіздерін білдіріп, қуаныштан лепірген көңілдері шырқау шегіне барып қалғаны байқалады. Шырша мерекесі басталып кетті, жан-жағыңның бәрі қаптаған қой мен арқардың құлжасындай мүйізді қошқарлар, оқыранған Қамбар Ата түлігі дейсіңбе бәрі бар, бейне бір жайлауда жүргендейсің. Бұның бәрі «Қой жылының» нышаны. Ауыл ағаларының құттықтауынан соң аулымыздың тағы да бір әдетке айналған жақсылығы әр саланың оза шапқан озаттарына, яғни «Жыл мұғалімі» «Мейрімді мейірбике» «Білікті кәсіпкер»,Үздік спортшы» «Белсенді өнерпаз» Қой жылы келуі құрметіне «Шопан ата» және «Құрметті қонақ» сондай-ақ, әжелер тобы мүшелеріне «Асыл әже» сияқты номинацияларға бағалы сыйлықтар табысталды.

Әрине, бұл халықтық-бұқаралық мереке болған соң түрлі көңілді әуендер ойналып, халайық ойын-сауық құрды. Мәдениет отауының кең сарайында ине шаншар орын жоқ. Қарша қызын ерткен қарт Аяз Ата да көп күттірмей келіп, ел-жұртқа жақсы тілек арнап, сый жасап, батасын беріп аттанып кетті. Соңына қарай дәстүрге сай марапаттау рәсімі болып I-II –III орындармен қатар маска киіп келген сауықшылардың бәріне лайықты сыйлықтар үлестіріліп, «Қозысын ерткен саулыққа» бас жүлдеге түрлі-түсті плазмалық теледидар тарту етілді. Үлкен мерекеде үлкен сыяпат жасаған «Атымтай-жомарт» Тассайдың төл тумасы Архат Мауытбекұлы баурымыз болатын. Жаңа жыл кешіне Архаттың жары Ботагөз, анасы Күләш Қалиқызы мен әкесі, Тассайлық белгілі бизнесмен Мауытбек Оразбаев та болып ауылдастарымен ақтарыла араласып, арқа-жарқа болып қуаныштарын бөлісті.

Әу,ағайын! Қой жылы құт әкелсін! 

Катрен Байжұманов Тассай ауылы

Құрметтi Көкпекті ауданының тұрғындары!

Баршамызға сүйiктi әрi шын мәнiндегi отбасылық мереке — Жаңа жыл жақындап қалды. Ол әрқашан бiздiң ежелгi жоспарларымыз бен тiлектерiмiз орындалады, жаңаруға және жетiстiктерге жетуге деген үмiтiмiзбен ұштасып жатады.

Жаңа жыл — әдетте қорытынды шығаратын, өткендi пайымдайтын және болашаққа жоспар жасайтын кезең. 2014 жыл елiмiз үшiн жетiстiктер тарихының тағы бiр ұмытылмас парағына айналды деуге бiзде бүкiл негiз бар. Өзiнiң Тәуелсiздiгiнiң 23 жылдығын атап өткен Қазақстан экономикасы дамуының жоғары қарқынын және азаматтарының әл-ауқатының ұдайы өскендiгiн көрсетiп отырған, бұрынғыдан да қуатты және мықты мемлекетке айналды. Бүгiнгi таңда әрбiр қазақстандық сияқты біздің ауданның тұрғындары да болашаққа сенiммен қарайды, өзiнiң елiн және өзiнiң Президентiн мақтан тұтады.

Алдағы қой жылы Мемлекет басшысы Н.Ә.Назарбаевтың Қазақстан халқына арнаған «Нұрлы жол – болашаққа бастар жол» атты маңызды да тағдырлы Жолдауын жүзеге асырудың басталуымен әйгiлi болмақ. Мемлекет басшысы алдымызға қойған басты мақсат — дағдарыстан шығудың жаңа экономикалық саясатын жүзеге асыру .

Осы өршiл де биiк мақсатқа қол жеткiзуде ауданымыздың тұрғындары айтарлықтай үлес қосады деп сенемiз! Бұл үшiн бiзде қажет нәрсенiң бәрi және ең бастысы — талантты, еңбекке қабiлеттi адамдар бар. Тарих қойнауына сүңгiген 2014 жыл әрқайсымыз үшiн ерекше болды. Әркiмге өзiнше қымбат. Бұл жыл оқиғаларға бай болды, олар бүкiл аудан тұрғындарын бiрiктiрiп, әрбiр шаңыраққа шуақ шашты. Бұл — жұмысымыз, отбасымыз, қам-қарекеттерiмiз, бұл — қол жеткiзген жетiстiктерiмiз, болашаққа арналған бiрiккен жоспарларымыз.

Қымбатты жерлестер!

Қол жеткiзгеннiң барлығы — Сiздердiң еңбектерiңiздiң және мақсат-керлiктерiңiздiң нәтижесi. Бiздiң баршамызды өңiрiмiздi дәулеттi, әсем де абат етуге деген ортақ ұмтылыс бiрiктiредi. Балаларымыз дәулеттi, қауiпсiз және өркендеген елде, қарияларын құрметтейтiн, жаңа мақсатқа қол жеткiзуге ұмтылып отырған көпэтносты халқымыздың дәстүрлерiн сақтайтын елде өсiп, өмiр сүрулерi үшiн не iстесек те, бәрiн солар үшiн жасау үстiндемiз. Біз Мәңгілік ел құру жолында бірлесе еңбек етіп, алға қарай қарыштай береміз.

Жаңа 2015 жыл 2014 жылдың эстафетасын қабылдап, жарқын идеялар, iзгi өзгерiстер және айтулы оқиғалар жылына айналғай! Еліміздің туар жылы атап өтетін Ұлы Жеңістің 70 жылдығы, Қазақстан Халықтары Ассамблеясының 20 жылдығы мерейтойларын лайықты қарсы алуды жазсын!

Жаңа жыл әрбiр шаңыраққа, әрбiр отбасына татулық пен келiсiм дарытып, амандық-саулық пен қуанышқа бөлесiн, сәттiлiкке толы болсын! Жаңа жыл құтты болсын!

Р.Сағындықов, аудан әкімінің міндетін атқарушы

Р.Беспаев, аудандық мәслихаттың хатшысы

Бес бірдей отбасыға Тәуелсіздік күні қарсаңында салтанатты түрде пәтер кілттері табысталып, мерекемен қатар келген жаңа қоныстарын тойлады. Олар: Серікболсын Темірғалиев, Лидия Шәкенова, Бахты Зейноллина, Күлмира Сәдиева, Шолпан Түребаева.

«Нұрлы жол – Болашаққа бастар жол» атты Жолдауында Жаңа экономикалық саясат анықталды. Жолдаудың бесінші бағытында Елбасы тұрғынүй инфрақұрылымын нығатуды белгілеп, оның жүзеге асуын тапсырған болатын. Республикамыздың ең басты мерекесі қарсаңында ауданда Президент Жолдауын іске асырудың алғашқы қадамдары жасалынып, тұрғындар баспанамен қамтамасыз етілді.

Аудандық тұрғынүй комиссиясы төрағасының орынбасары Руслан Бектасовтың пікірінше, біздің аудан дотациялы, бірақ, бұған қарамастан, аудан әкімінің тапсырмасымен тұрғындарды баспанаменқамту мәселесі мақсатты түрде шешілуі тиіс. –Әрине, ең бірінші баспанамен әлеуметтік көмекке зәру топтар қамтамасыз етіледі. Яғни, Тәуелсіздік күні қарсаңында баспанаға ие болып жатқандар қатарында, балалар үйінің түлектері, бірінші топтағы мүгедектер, сонымен қатар, баспанасы апатты жағдайда тұрғандар, ондай пәтерде тұру тұрғындардың өмірлеріне қауіп тудыруда. Бүгін Қазақстан халқы үшін ең ұлы мереке - Тәуелсіздік алғанымызға жиырма үш жыл толды. Осы уақыт аралығында жаңа экономикалық саясаттың ірге тасы қаланып, қазақстандықтардың өмір сүру салты мен сапасы біршама өзгерді. Құрметті жерлестер! Біздің жүрегіміз мемлекет үшін мақтанышқа толы болып, береке бірлік пен түсіністікке ұмтылып, табысты еңбегіміз сенімді, жарқын болашақтыңкепілі болғай! Шын жүректен баршаларыңызға мықты денсаулық, көтеріңкі көңіл күй, бақыт тілеймін. Қазақстанның бақытты болашағына сеніммен қарайық!

Жаңа қоныстарын тойлап жатқан қуаныш иелерінің пікірін, олармен тілдесу кезінде анықтадық.

Серікболсын Темірғалиев, балалар үйінің тәрбиеленушісі:

-Елбасының ерен еңбегімен қазақ ұлты айдай әлемге танылды, өзі әлем жұртшылығы мойындаған дегдарға айналды. Елін елден оздырған, қазақ баласы үшін мәңгі мақтаныш болып қалатын Президентіміз Нұрсұлтан Әбішұлы Назарбаев әрқашан халқының сенім артқан сүйікті ұлы. Бүгін, міне, баспаналы болып қуанышқа кенеліп отырмын. Осының барлығы Елбасының сындарлы саясатының арқасы. Қашанда халқының қамын ойлайтын Нұрсұлтан Әбішұлына алғысым шексіз. Қазақстан Республикасының Тәуелсіздік күніне орай шын жүректен шыққан ыстық ықылас білдіремін.Бұл күн – ата-бабамыз аңсаған арманның жүзеге асқан, елімізге еркіндік сыйлаған Ұлы күн. Осындай маңызы бар тарихи думанда еліміздің туы асқақтап, келешегі көркейе берсін.Сіздерге мықты денсаулық, отбасыларыңызға бақыт, сәтті күндер, зор жетістіктер тілеймін.

Шолпан Түребаева:

-Қазақстан Республикасының тұңғыш президенті Нұрсұлтан Назарбаев Әбішұлы сияқты талантты тұлғаның, халқын сүйетін ұлтжанды азаматтың болғанына мыңда бір шүкір. Елбасының сындарлы саясатының арқасында баспаналы болып отырмын. Халқының жағдайына алаңдайтын Көшбасшымызға алғыс білдіремін.Еліміз өркендеп келеді. Алға қойылған мақсаттарымыз да жүзеге асуда. Халқымыздың ғасырлар бойы аңсаған Тәуелсіздігіне ие болғанымызға биыл жиырма үш жыл толып отыр. Осындай мерейлі шақта еліміздің гүлденіп-көркеюі жолында аянбай еңбек етіп жүрген қазақстандықтарды Ұлттық мерекемізбен құттықтағым келеді. Аудан халқына денсаулықтарыңыз мықты, еңбектеріңіз табысты болсын деп тілеймін.

Надежда ШАРОВА