Құрметті аудан тұрғындары!

Сіздерді Ұлыстың Ұлы күні – Наурыз мерекесімен шын жүректен құттықтаймыз! Табиғат ананың түрленіп, қызылды - жасылды күйге еніп, күн менен түн теңесіп, еңбексүйгіш халқымыздың алдағы күндерден зор үміт күтер күні - осы Наурыз мерекесі.

Біріккен Ұлттар Ұйымының шешімімен әлемдік деңгейде аталып өтетін және ЮНЕСКО-ның мәдени мұра санатына қосылған Наурыз мейрамы салт-дәстүріміздің, тіліміз бен дініміздің, бірлігіміз бен татулығымыздың, жаңаруымыз бен жарасымды ынтымағымыздың дамуына себепші ұлы мерекеге айналды. Елбасымыз - Нұрсұлтан Әбішұлы Назарбаев Қазақстан халқына арнаған «Нұрлы жол – болашаққа жол» атты Жолдауында: «Біз 2015 жылды Қазақстан халқы Ассамблеясы жылы деп жарияладық. Елдің тұтастығы мен бірлігі, татулығы мен тыныштығы ең басты назарда. Ел бірлігі – біздің барша табыстарымыздың кілті. Тұрақты дамудың қазақстандық моделі бүгінде бүкіл әлемге үлгі», - деп атап өткен болатын. Биылғы Наурыз мерекесі айтулы күндер тоғысында аталғалы отыр, сондықтан да бұл Нау-рыз еліміздің, ауданымыздың көпұлтты халқын одан әрі ұйыстыра түсері хақ.

Қазіргі уақытта Наурыз жаңа сипатқа ие болды, ұлтына, діни сеніміне қарамастан Қазақстанды мекендейтін барлық ұлттар мен ұлыстардың ортақ мерекесіне айналды. Халықтар арасындағы достықты бекітуге, бауырластық қарым - қатынастардың нығаюына, әр ұлттың салт - дәстүрінің қайта жаңғыруына осы мейрам үлкен үлесін қосып отыр.

Наурызда айтылған барлық тілек қабыл болады деген де наным бар. Наурыз мейрамы туған жер топырағына құт - береке әкелсін. Баршаңызға амандық, саулық, дастархандарыңызға молшылық тілейміз!

Р.Сағындықов,Көкпекті ауданының әкімі м.а.

Пікір: