Көкпекті ауданындағы Оқушылар шығармашылық сарайында балалардың қиялын ұштап, талантын ашуға бар жанын салып жүрген ұстаздардың бірі – «Сурет және дизайн» және «Құм терапиясы» үйірмесінің жетекшісі Хайса Ахнур. Ол 2022 жылдан бері жас ұрпақтың бойындағы шығармашылық қабілетті оятуды мақсат тұтып келеді. Жетекшінің шәкірттері бүгінде республикалық, тіпті халықаралық байқауларда жеңіс тұғырынан көрініп, ауданымыздың атын асқақтатуда. Бұл – Ахнурдың әдістемелік шеберлігінің, балаларға деген сенімі мен жанқияр еңбегінің айқын жемісі.

Үйірмеге тұрақты түрде 44 оқушы қатысады. Мұнда балалар сурет салудың әртүрлі техникасын меңгеріп қана қоймай, сәндік-қолданбалы өнер, композиция, графика, макет жасау сияқты бағыттарды игереді. Олар түстер үйлесімін сезінуді, кеңістіктік ойлауды, пропорция мен симметрияны түсінуді үйреніп, өз жобаларын жасап шығады. Әр бала салған суреті арқылы ішкі жан дүниесін, көңіл-күйін, айналаға көзқарасын еркін жеткізе алады. Бұл олардың өз-өзіне сенімді болуына жол ашады.