Ағымдағы жылдың 7 сәуір күні Көкпекті ауылдық округінің ғимаратында «Бастау-Бизнес» жобасы бойынша алғашқы топ кәсіпкерлік сабақтарын алды. Жаңа жобаның тұңғыш шәкірттеріне арнайы ақжарма тілектерін Көкпекті ауданы әкімінің міндетін атқарушы Е.Қалдыбаев, Көкпекті ауылдық округінің әкімі Е.Ниязбаев арнады.

Қазақстанда алғаш қолға алынған «Бастау - Бизнес» жобасы бойынша Көкпекті ауданы тегін оқытуды бастап кетті. Газетіміздің алдыңғы санында жариялағанымыздай курсқа қатысушылардың құжаттары сәуір айының басынан қабылданған болатын. Кәсіпкерлер палатасының Көкпекті ауданы филиалына арнайы сабақ беруге Астана қаласынан келген бизнес-жаттықтырушысы Айнұр Омарова: «Бизнес-Бастау» бойынша мал өсіру, егін егу, жылыжай салу, ауыл шаруашылығын дамытуға қажетті мал қораларын салу секілді, жеке шаруашылығын бастауды не болмаса бұрынғы бизнесін кеңейтуді жоспарлап жүрген азаматтар кәсіптің негізін меңгере алады. Курс-ты білікті бизнес-жаттықтырушылар жүргізіп, азаматтарға бизнес жобалар жасауына қолдау көрсетеді», - дейді. Тыңдаушылар курсты бітіргендігі туралы сертификат алғаннан кейін, жасалған бизнес жобаларын комиссияның алдында қорғап, өздерінің кәсіпкерлікпен айналысуға деген әлеуетін көрсетеді. Кәсіпкерлік жолға қадам басқан көкпектіліктердің пікірлері төмендегідей:
Серікқазы Исабаев, «Бес ағайын» ШҚ басшысы, Қарағандыкөл ауылы:
- Мен мал басын көбейту, мақсатында осы жобаға қатысып бағымды сынауға келдім. Арнайы тестен өтіп 57 ұпай жинап, алғашқы топта оқу мүмкіншілігіне ие болдым. Бұл жобаның бастамасы жақсы, өзіме ұнады. Менің кәсібіме көмегі тиетініне сенімдімін.
Архат Сүлейменов, Самар ауылы:
- Бұл жоба туралы газет бетінен оқыдым. Өзім өкінішке орай, 3-топтағы мүмкіндігі шектеулі азаматтардың бірімін. Жоба бойынша дәріс алып, мал асырау жоспарымда бар.
Маржан Кәткенова, Теректі ауылы:
- Мен жұмыссыздар қатарындамын. Осы бағдарламаға өту үшін тест тапсырып, 67 ұпай жинадым. Мақсатым, шағын дүкен ашу. «Бастау» деп аты айтып тұрғандай осында отырғандардың кә-сіптерінің бастауы болады деп ойлаймын.

Клара ҚАЙЫПЖАНҚЫЗЫ

Пікір: