Көкпекті аудандық мәслихатының кезекті оныншы сессиясының күн тәртібінде аудандық бюджеттің орындалуы туралы есеп тыңдалды. Мәслихат депутаты Ринат Кажиакперов төрағалық еткен кезекті сессия жұмысына аудан әкімінің міндетін атқарушы Ерлан Қалдыбаев, аудан әкімінің орынбасарлары, ауылдық округ әкімдері, дербес бөлім басшылары қатысты.
Күн тәртібіне сай бірінші болып сөз алған экономика және қаржы бөлімінің басшысы Гаухар Смағұлова 2016 жылға арналған аудандық бюджеттің орындалуы туралы есептік баяндама жасады. Шығыс Қазақстан облысы бойынша тексеру комиссиясының мүшесі Советқан Дүйсенбаев 2016 жылға арналған аудандық бюджеттің орындалуын бақылаудың нәтижесі туралы есеппен таныстырды.

- Есепті жылдың қорытындысында өңірді дамытудың экономикалық көрсеткіштері бойынша экономиканың барлық дерлік салаларында болжамның артығымен орындалғаны байқалады. Аудан бюджетінің бекітілген параметрлері жыл көлемінде енгізілген нақтылаулар мен түзетулерді ескере отырып, жалпы қанағаттанарлық деңгейде орындалды. Есепті кезеңде аудан бюджеті түсімдер бойынша 103,2%-ға және шығыстар бойынша алты мәрте нақтылауды ескере отырып 99,6%-ға орындалды, - дейді тексеру комиссиясының мүшесі.
Ауданның көктемгі дала жұмыстарын өткізуге дайындық барысы туралы аудан әкімінің орынбасары Марат Теміржанов баяндама жасады. Баяндамашының дерегіне сүйенер болсақ, ауданның ауылшаруашылық саласы көктемгі – дала жұмыстарына тас-түйін дайын. Дегенмен, депутаттар тарапынан Марат Қапарұлына дайындық барысында әлі де пысықтауды қажет ететін кейбір мәселелер бойынша сұрақтар қойылды. Оның ішінде халық қалаулыларын толғандырып отырған жеңілдетілген жанармаймен қамтамасыз ету мәселесі.
Әртүрлі бөлімінде сөз алған мәслихат хатшысы Талғат Сармановтың баяндамасындағы барлық сұрақтар бойынша қаулы шешімдері қабылданды.

Дархан БЕРДІБЕК

Пікір: