1989 жылы ақпан айының 15-де талай аналарды перзенттерінен айырған, мыңдаған жерлес бауырларымыз қаза тапқан қасіретті де, қайғылы Ауған соғысы» аяқталды. Бұл күні бұрынғы Кеңес одағы құрамында болған елдер сол жылдардағы жауынгерлеріміздің өшпес ерлігі алдында бас иіп, жат жерде ажал құшқан батырларды қайғыра еске алады.

Ауған соғысы ешқашан да естен кетпек емес. Сол соғыста Отан алдында берген анттарына адал болған, өздерінің батылдығы мен жанқиярлығын паш еткен ұлдарын, борыштарын мүлтіксіз атқарған азаматтарды құрмет тұту әрқайсымыздың борышымыз.

Бүгінгі күні ортамызда жүрген ауғандық жауынгерлеріміз бейбіт өмірдегі жарқын істерімен, қоғамдық жұмыстарға белсенділіктерімен, түрлі кәсіпті игерудегі ерен еңбектерімен ерекшеленуде. Олар өскелең ұрпақ үшін отансүйгіштік пен патриоттықтың жарқын үлгісі болуда. Сонау Ауған жерінде қару асынып мұң арқалаған сын сағаттарда бірін-бірі бауыр дескен азаматтар бүгінгі таңда ауданымыздың түкпір-түкпірінде еңбек етуде.

Қазіргі таңда біз Ауған соғысында өмірін қиған солдаттар, сержанттар мен офицерлер, әскери дәрігерлер және басқа да жауынгерлік сертіне беріктігін көрсеткен батыл да қайсар азаматтарды мақтан тұтамыз. Олардың есімдері мәңгілік даңқ және естелік тақтасына алтын әріптермен жазылған. Олар біздің даңқты жерлестеріміз - Александр Викторович Асламов, Қанат Биахметұлы  Букетов, Марат Ибрагимович Бейсембаев, Нұрсұлтан Орақпайұлы Разақов, Латиф Абайұлы Фахрутдинов. Біз олардың туған-туыстарының орны толмас қайғысына ортақпыз. Біз атақ алу үшін емес, азаттық алу үшін соғысқан, ұлы мақсат жолында  жандарын қиған сарбаздарымызды ешқашан ұмытпаймыз.

Құрметті Ауған соғысы ардагерлері! Жауынгер-интернационалистер!

Сіздерді Ауғанстан жерінен Кеңес әскерінің шығарылуына 30 жыл толған атаулы күнмен құттықтаймыз. Ел үшін атқарған және әлі де жүзеге асыратын істеріңіз  үшін сіздерге алғыс айтамыз.

Сіздерге зор денсаулық, ұзақ ғұмыр, құт-береке, туғандарыңыз бен жақындарыңызға бақыт тілейміз. Аспанымыз ашық болсын, бейбіт өмір жасай берсін!

А.Смаилов, аудан әкімі

Т.Сарманов, аудандық мәслихат хатшысы