2016 жылдың 20 наурызы. Қазақстан халқының Тәуелсіздігі жылнамасында тағы бір саяси айтулы оқиға орын алды. Таңғы 7.00-де сайлау учаскелеріне жиналған сайлау комиссиясының мүшелері, ал-ғашқы болып дауыс беруге асыққан белсенді азаматтар Қазақстан Республикасының мемлекеттік Әнұранын салтанатты орындап, саяси науқанды ашық деп жариялады.
Жалпы Көкпекті ауданы бойынша дауыс берушілер саны 20350 адам, 98,44% құрады. Әсіресе, белсенділік танытқан Қарағандыкөл, Егінбұлақ, Үлкенбөкен, Өрнек, Милетополь, Песчанка сайлау учаскелерінің тұрғындарын атап өту керек. Бұл күні таңертең ертемен аудан орталығындағы үш дауыс беру учаскесінде де көңілді музыка әуені естіліп, тұрғындар тезірек өз таңдауларын жасауға асыға басып, тиісті орындарға ағыла бастағаны көрер көзге аян. Атап айтқанда, №784 Заречный сайлау учаскесінде ең бірінші дауыс берген азаматтар - Ұлы Отан соғысы ардагері Илья Бирюков, Өрт сөндіру бөлімінің қызметкері Мәди Назарханов және 18 жасқа жаңа толып, бірінші рет дауыс беру мүмкіндігіне ие болған Балжан Болатоваға сыйлықтар табысталды.
Ал, Самар ауылындағы №10 Абай сайлау округіндегі №820 сайлау учаскесі комиссиясының төрағасы Н.Саңқайбаев комиссия мүшелерін, сайлаушылар мен бақылаушыларды және се-німді тұлғаларды айтулы күнмен құттықтап, сәттілік тіледі. Дауыс беру басталар алдында жиналғандарды Көкпекті ауданының құрметті азаматы Б.Қожамбетов, ауылдың сыйлы ақсақалы Қ.Әжіқанов құттықтады. Сөз алған сайлаушылар ауылдастарын осы айтулы күнмен құттықтап, болашақ үшін дауыс беруде белсенділік танытуға үндеді. Ең алғашқы бюллетеньдер дауыс беру жәшігіне салынып, сайлау басталды.

Құрметті аудан тұрғындары!

Ақтың молаятын, жарықтың ұзаратын, нұрдың молығатын, тіршіліктің жаңаратын, өмірдің жаңғыратын, пейілдің түзелетін, көңілдің кеңитін кезеңі - Наурыз мейрамы құтты болсын! Көктің тынысын тыңдап, жердің тамырын басқан, тұрмыс-тіршілігін табиғат-анамен тығыз байланыстырған халқымыз Наурызды жаңару мен жасампаздықтың бастауы, ырыc пен берекенің арқауы деп бағалаған. Олай болса, Наурыз мерекесі баршаңызға жаңа жетістіктер, молшылық пен татулық әкелсін.
Наурыз – бұл тек көктемнің ғана емес, бұл ең әуелі ізгілік пен жақсылықтың мейрамы. Ұлыстың осы бір ұлы күні жер бетіндегі қанды соғыстар, дау-жанжалдар тоқтатылып, адамдар бір-біріне деген өкпе-реніштерін ұмытып, кешірімге келіп, татуласып, табыса білген. Халқымыз мол дастарқанын жайып, ақжарқын көңілмен жүздесіп, дәм татысып, өткен-кеткеннен сыр тартып, барша адам баласына жақсылық, аманшылық тілеп, жастарға ақ баталарын берген.
Тәуелсіз мемлекетіміздің қалыптасуымен бірге жаңғырған Наурыз мейрамы көпұлтты Қазақстан халқы үшін мерейлі мерекеге айналып, бірлік пен ынтымақтың, саяси тұрақтылықтың нығаюының негізі болды. Біз үшін Тәуелсіздіктен асқан мұрат, Мәңгілік Елден асқан мақсат жоқ! Ұлт Көшбасшысы, Елбасы Нұрсұлтан Әбішұлы Назарбаев ұсынған осы жолда ата-бабаларымыздың арманын жалғап, әлемдегі ең ірі дамыған елдер қатарына кіру жолында бар күш-жігерімізді аямайық! Бүгінде біз Елбасының ұстанып отырған оң бағыттағы реформаларының арқасында көптеген табыстарға қол жеткіздік. Мемлекетіміз өркендеп өсіп, еліміздің әл-ауқаты күн санап артып келе жатыр. Отанымыздағы береке-бірліктің, бейбітшіліктің арқасында тәуелсіз еліміздің экономикасы қарқынды даму үстінде. Өнеркәсіп, шағын және орта кәсіпкерлік, құрылыс, жер, жол және көлік қатынасы, энергетика мен экология, әлеуметтік саясат сияқты аса маңызды салаларды кешенді түрде қолға алдық деп нық сеніммен айта аламыз.

Ардақты ағайын!
Өздеріңіз жақсы білетіндей биыл 20 наурыз - Қазақстан Республикасында Парламенттің кезектен тыс және барлық деңгейдегі мәслихаттың сайлау күні. Бұл әрбір азаматқа үлкен жауапкершілік жүктейтін аса ауқымды саяси науқан.
Құрметті жерлестер!
Сіздерді ақ босағадан аттаған Ұлыстың ұлы күнімен құттықтай отырып, баршаңызға денсаулық, ырыс пен ынтымақ және отбасыларыңызға амандық тілейміз!
Ұлыс оң болсын! Ақ мол болсын!
Көктемнің шуақты күн нұры әр отбасына бейбітшілік, молшылық, бақыт, қуаныш әкелсін.
Р.Сағандықов, Көкпекті ауданының әкімі
Р.Беспаев, аудандық мәслихаттың хатшысы