Ақ Ертіс пен жазира Жайсаңның кұм бұйратты ойпаңы мен мидай жазық даласында теңгедей жалтырап Қарағанды көлі жатыр. Атауы қарағанды болмаса, жағасы қопалы қалың қамыс. Осы көлдің түбінде Қарағандыкөл ауылы орналасқан. Екі тәжлі мектеп ғимараты алыстан мен мұндалап, бақуатты ауылдың берекесін арттырып тұратын. Сол мектептің оқушыларының басты үлгісі – дене шынықтыру пәні мұғалімі Жұмағазы Лекеров болатын.
Жұмағазы Баяхметұлы Лекеров еңбек жолын Қарғандыкөл ауылында дене шынықтыру және алғашқы әскери дайындық пәнінің мұғалім болып бастаған. 1980 жылдардан бері Теректі ауылындағы Қ.Аухадиев атындағы орта мектепте алғашқы әскери дайындық пәнінің мұғалімі болып 41 жыл көлемінде ұстаздық еткен. «Өн бойың тұнған ар еді» деп Абай атамыз айтқандай арлылық пен намысшылдықты шәкірттерінің бойына сіңіре алған ұстаз Жұмағазы Баяхметұлы еді. «Физрук» Лекеров ұлдардың дене тәрбиесі мен қатар мінез тәрбиесіне қатты көңіл бөлетін. Салмақтылық, жігерлілік бала бойындағы кездесіп қалар мақтаншық пен даңғойлықты өшіріп тұруын бақылайтын. Өз үлгісімен көрсететін.
«Мұғалім Лекеров үйрететін кез-келген спорт түрі біз үшін жанымызбен сүйіп ойнар ойынға айналып кететін. Басқа сабақққа бармасақ та Жұман ағаның сабағынан қалмайтынбыз. Менің 60 жастан асқандағы әлемдік жетістіктерім, осы ұстазымың арқасы, – дейді самбодан КСРО спорт шебері Серікбосын Тлебалдин.

Тәуелсіздігіміздің таңы атқан жиырма сегіз жылдан бергі уақыт ішінде біздің елімізде бұқаралық және кәсіби спорт түрлерін дамыту жолында Елбасымыз Нұрсұлтан Назарбаевтың тікелей басшылығымен қыруар жұмыстар атқарылды. Қазіргі таңда спортқа баса назар аударылып, бұл саланы әрдайым мемлекеттік маңызы басым бағыттар санатына қосып келеді.

Дана халқымыз «Тәні саудың - жаны сау» немесе «Бірінші байлық - денсаулық» деп бекер айтпаған. Себебі, салауатты өмір сүрудің алғы шарттарының бірі – спорттың адам өмірінде алатын орны, тәрбиелік мәні ерекше. Міне, осындай салауаттылықты басты ұстаным еткен аудан мектептеріндегі оқушылар бүгінде жетістіктерден кенде емес. Аудан мектептерінде тәрбиеленіп жатқан спортшыларымыздың алған асулары мен жетістіктері ауыз толтырып айтуға тұрарлық. Осы орайда Көкпекті аудандық білім бөлімінің әдіскері Талғат Касаиновпен сұхбаттасып, әңгімеге тартқан едік.
- Көкпекті аудандық білім бөліміне 2018 жылдың қыркүйек айынан бастап денешынықтыру және АӘД пәні бойынша әдіскер болып еңбек етудемін. Біздің жұмыс жүйеміз жыл басында бөлім басшысы Шолпан Нұрғазықызы Мұстафиновамен бекітілген жылдық жоспар құрылып, соның негізінде іске асады. Біздің бөлімнің қызметі мынаған бағытталған: спорт қозғалысын, салауаттылық өмір салты ұстанымдарын насихаттауға; спорт резервтері мен халықаралық дәрежеде спортшыларды даярлауға; республикалық және әлемдік спорт аренасында жоғарғы спорт нәтижелеріне жету.

Шахмат – нағыз ақыл-ой спорты. Шахмат ойыны еліміздегі жетекші спорт түрлерінің біріне айналып келеді. Ақыл-ойдың гимнастикасы саналатын шахматтың отаны – Үндістан. Ежелгі Үндістан жерінде пайда болған бұл ойын біртіндеп Парсы, Араб, Еуропа және Азия елдеріне кеңінен тараған. Соңғы жылдары біздің елімізде де ерекше қарқынмен даму үстінде.

Ағымдағы жылдың қазан айында Қазақстан КВН Одағы, Семей КВН  филиалы, Семей мектеп лигасы ұйымдастырған «Маусымашар – 2019» фестивалі өткен болатын. 16 шақты команда қатысқан ақтық ойында Көкпекті ауылының жас «Питекантроп» командасы тартысты ойын көрсетіп «Маусым жаңалығы» аталымын жеңіп алды.

Аудан мектептерінің жайдарман клубтары арасындағы енді ғана тәй-тәй басып келе жатқан жас жайдарманшылардың ойын көрсетуде өз қолтаңбалары, өзіндік ерекшеліктері қалыптасқан. Жайдарман ойындарының облыстық сахнасында өнер көрсетуге әбден лайық балалар. Команда жетекшілері Әлижан Артықпаев және Мақсат Тоқсанов команданы жарысқа апаруға қолдап және қаржылай демеушілік көрсеткен Ирина Эдикқызы Абибуллаева, Роза Қуанышқызы Ташубаева, Талант Бақытбекұлына, Амангелді Ахметұлы Салдырғазин және Дархан Бердібекұлы Дюсембаевқа өздерінің және команданың атынан алғыс білдіреді.
Аудан намысын қорғап келген «Питекантроп» командасының құрамында Көкпекті орта мектебінің оқушылары Бейбарыс Тоқсанов, Дастан Бақытбек, Нұрсұлтан Боқанаев және Ж.Шайжүнісов атындағы мектеп оқушысы Мерей Серіков. Жас буын жайдарманшыларға жетекшілік етіп жүрген Мақсат Мейрамұлы ойын туралы өз ойын білдірді: