Көкпекті ауданында мектеп ұстаздары арасында волейбол турнирі өткізілді. 9 ақпан күні өткен волейбол жарысының ашылуы-на аудан әкімі Ділдәбек Оразбаев қатысып, спортты серік еткен ұстаздарға сәттілік тіледі.
Аудан орталығында өткен турнирге ауданның барлық мектептерінің құрама командалары қатысты. Шағын мектептер бірігіп құрама шығарды. Спортты серік еткен сергек жігіттермен бір қатарда нәзік жанды ару волейболшылар да табылды. Турнирдің сәнін келтіріп, алаңды ажарландыра түскен арулардың ойынын көрермендер тамсана тамашалады.

-Жарысты ұйымдас-тырудағы басты мақсатымыз - аудан ұстаздары арасындағы достық және әріптестік қарым-қатынасты нығайту. Бұл жерде басты мақсат жеңіске жету емес - әріптестермен танысу, өзара пікіралмасу, жұмыстан тыс қарым-қатынас орнату. Ұжымдық рухты қалыптастыруға бағытталды десек артық емес. Болашақ ұрпақ тәрбиесімен айналысатын ұстаздар қауымының спортты серік етіп, салауатты өмір салтын ұстануы және насихаттауы маңызды. Алдағы уақытта осындай шаралар жиі өткізілетін болады, - дейді жарысты ұйымдастырушы білім бөлімінің басшысы Аслан Танысбаев.
Жарыс қорытындысы бойынша 1 орынды Көкжайық мектебінің ұстаздары жеңіп алды. Жүлделі 2-орынды Көкпекті мектебінің құрамасы олжалады. Үлгілімалшы ауылының Абай атындағы орта мектеп құрамасы 3-орынға табан тіреді.
Ұйымдастыру алқасының шешімімен бірқатар ойыншылар үздік деп танылды. Ақой ауылының Пушкин атындағы мектеп ұстазы А.Даукенова «Үздік ойыншы» атанды. Шұғылбайдан келген Д.Маутқазин «Үздік ойын үйлестіруші» және Ж.Шайжүнісов атындағы мектеп ұстазы Б.Шаймарданова «Үздік қорғаушы» номинациясымен марапатталды.
Жарыс жеңімпаздары мен жүлдегерлеріне ақшалай және бағалы сыйлықтар, жеңімпаз кубогы мен алғыс хаттар табысталды. Көкпекті аудандық балалар және жасөспірімдер спорт мектебінің волейбол жаттықтырушысы Алтай Нұрмұхаметов бастаған төрешілер алқасы ойынның әділ өтуіне бар күш-жігерін жұмсады.

Пікір: