Өткен жексенбіде Көкпекті ауданының № 1 ЖБСМ-де таэквон-до ІТҒ бойынша Шығыс Қазақстан облысының чемпионаты өтті. ШҚО спорт комитеті басқармасының ұйымдастыруымен өткен спорттық шарада Көкпекті, Күршім, Абай, Бесқарағай аудандарынан, Курчатов және Семей қаласынан келген командалардың таэквон-дошылары бақ сынасты.
ШҚО таэквон-до ІТҒ бойынша Президенті, 6 - Дан қара белбеу иегері, Қазақстан Респу-бликасының еңбек сіңірген жаттықтырушысы Махаббат Советханұлы Советхан төрағалық еткен әділқазылар алқасы шығыс жекпе-жегіне шыққан жас спортшылардың әр қимылын қалт жібермей сарапқа салды. Жекпе-жек салмақ дәрежелері бойынша, ұл және қыз балалар арасында болғанын айта кеткен жөн.

Спортзал іші кішкентай ғана балғындардың жанкүйерлеріне, яғни, ата-әжелері мен әке-шешесі, аға-бауырларына толы. Олар сайыскерлерге дем беріп, моральдық қолдау жасауда. Әр өңірден жарысқа баптап әкелген шәкірттеріне жаттықтырушылар да үзілістерде ақыл-кеңес беріп, жан сала жеңіске қарай рухтандыруда. Әр жұптың жекпе-жектегі ұрысын тамашалап тұрып, өзіңіз де қалай тақым қысып, тілектес болып тұрғаныңызды байқамай да қаласыз.
Намыс пен жеңіс үшін тартысты өткен бәсеке қорытындысында жалпыкомандалық есеп бо-йынша, көпе-көрінеу басым түскен көкпектіліктер жүлделі І-орын, (бапкері Б.Рахимов), ІІ-орынға Семей командасы (бапкері Д:Тұрдығұлов) табан тіреді. ІІІ-орынға Абай ауданы (бапкері Е.Болатбеков) мен Курчатов кентінен (бапкері Н.Қожахметов) келген екі команда қол жеткізді. Жеңімпаздар Облыстық спорт комитеті басқар-масының мақтау грамоталарымен және медальдарымен марапатталды.
Чемпионат нәтижесіне қарап, өскелең ұрпақ бойына табандылық, жігерлілік, қайсарлық және мақсаткерлік, патриоттық қасиеттерді сіңіруде маңызды орын алатын таэквон-до спорты Көкпекті ауданында жақсы жолға қойылған деуге толық негіз бар.

Бақыт МҮЛІКОВА

Пікір: