Көкпектіде Уақ Бармақ батырды еске алуға арналған футбол жарысы мәресіне жетті. Қараша айында басталған футбол чемпионатының ақтық ойындары 24 наурызда ойналды. Батыр ұрпағы болып келетін павлодардық жомарт азамат Сұңғат Тапалчинов демеушілік еткен жарыстың жүлдесін ауданның маңдайалды 8 құрамасы сарапқа салды. Әр ойыны тартысқа толы өткен жарыс барысында 56 ойын өткізіліп, оған 96 ойыншы қатысты. Елжанды азамат Аслан Таныспаевтың бастамасымен Көкпекті орта мектебінде өткен ойындарда барлығы 337 гол соғылды.

Аудан орталығының әкімі Ерлан Ниязбаев пен аудандық маслихат депутаты қатысқан жабылу салтанатында үздіктердің есімі аталды. Қарсыластарынан оқ бойы ұзап кеткен «Достар» құрамасы жеңімпаз кубогымен бірге 50 мың теңге сыйақыны иеленіп, Бармақ Батыр турнирінің жеңімпазы атанды. Оларға мықты қарсылас бола білген «Барыс» құрамасы 2 орынды олжаласа, ақтық ойын күні тікелей қарсыластарын ұтқан Көкпекті орта мектебінің құрамасы 3 орынды қанжығаларына байлады.
Сондай-ақ, жеке шеберліктері арқылы ерекше көзге түскен футболшылар да марапаттан тыс қалмады. Үздік қақпашы - Азамат Шакенов, үздік қорғаушы - Серік Байсенгіров, үздік шабуылшы болып – Рүстем Арынов танылса, турнирдің ең үздік ойыншысы атағын Ерасыл Абилов жеңіп алды.
Қызықты ойындармен 5 айға созылған футбол турнирі дәстүрлі болып жалғасын таппақ. Батыр ұрпақтары аталмыш жарысты жаз мезгілінде де өткіземіз деп отыр.

Дархан БЕРДІБЕК

Пікір: