Ала жаздай тыным таппай еңбек еткен Көкпектілік «Жасыл ел»  жастар жасақтары осымен 14-ші маусымды аяқтады. Еңбек маусымының салтанатты жабылу рәсімі Сәрсен Аманжолов атындағы Шығыс Қазақстан Мемлекеттік университетінде өтті. Атқарылған  жұмыс барысында кез-келген істі дөңгелетіп әкетіп, белсенділік танытқан 2 сарбазға диплом мен бағалы сыйлықтар табысталды.

Жазғы демалысын текке кетірмей, еңбек етіп өткізген жастар саны жыл санап артып келеді. Биылғы еңбек маусымында аудандық жастар орталығы арқылы «Жасыл ел» жасағына 35 квота бөлініп, онда 35 сарбаз еңбек еткен болатын. Жасыл ел жасағына Көкпекті ауылында 25, Самар ауылында 10 жас өрен аудан мен елді мекендерді көгалдандыру мен көркейту және абаттандыру жұмыстарының бел ортасынан көрінген болатын. Қыркүйектің 14 күні «Жасыл ел» жастар еңбек жасақтарының он төртінші еңбек маусымының жабылу салтанаты болып өтті. Салтанатты жиын барысында «Жасыл ел» жастар еңбек жасақтарының ең үздік сарбаздары анықталды. «Жасыл ел» жасағының жұмысын ұйымдастырушы Жастар орталы-ғының директоры Азамат Қалықовтың айтуынша, Әділжан Ғалымов биылғы он төртінші еңбек маусымының қорытындысы бойынша үздік сарбаз аталымына ие болды. Әділжан Ғалымов аграрлық факультетінде білім алады екен. Үшінші курс студентінің «Жасыл ел» жасағы қатарында жүргеніне биыл екінші жыл болыпты. Ол өз командасымен туған жері Көкпекті ауданын абаттандыру жұмыстарына ат салысты. «Жасыл ел» еңбек жасағымен осы уақыт аралығында 250 түп шырша, 700 ден аса гүл көшеттері отырғызылыпты. Белсенді жастар шамамен 15 нысанды қамтыған тазалық жұмыстарын жүргізіп, ауданды абаттандыруға өз үлестерін қосқан.

Шолпан АСЫЛБЕКҚЫЗЫ

Пікір: