Самар ауылындағы  Ауданаралық  аурухананың  ғасырға жуық тарихы бар мекеме. Ежелден келе жатқан аурухананың ұжымы қашанда білікті басшыларымен, дәрігерлерімен, медбикелерімен танымал болған. Қашанда үлкен ұжымда жұмыс істегенде үлкен-кішісі, кәрісі-жасы аралас болады. Уақыт талабы, үлкендер ұзақ жыл бойы жиған тәжірибелерін жастарға үйрете отырып, зейнет демалысына шығады, ал жастар олардың сеніп берген тізгінін нық ұстауға тырысады. Зейнетке кеткен әріптестерін ұмытпайды, мереке-жиында, қайғы-қасіретте де жалғыз тастамайды. Бұл мекемеде де сондай жақсы дәстүр қалыптасқан.

Бірінші қазан – Қарттар күнінде аурухананың бас дәрігері Н.Саңқайбаевтың бастамасымен мекеменің 80-ге жуық зейнеткері сыйлықсыз қалмады. Әр топқа бөлінген дәрігерлер, кәсіподақ ұйымының мүшелері, медбикелер әрқайсысының үйіне барып құттықтап, гүл шоқтарын, сыйлықтар табыс етті. Нұрлан Өртбайұлы жаңадан зейнеткерлікке шыққан медбикелер Г.Татманова, Б.Оралова және Г.Камалиеваны құттықтады. Бұл ақ халатты абзал жандар осы ауруханада сонау албырт шақтары, медициналық училищені аяқтаған күннен бастап қызмет етті. Олардың артынан талай жас маман тәлім алды. Ұзақ жылғы қызметтеріне алғыс айта отырып, бас дәрігер әріптестеріне зор денсаулық тіледі.

Үйлерінде отырып, күтпеген, айрықша құрметке ие болған зейнеткерлер де барлық әріптестеріне алғыстарын айтып, сәттілік, денсаулық пен отбасы берекесін тілеп, мереке күні өздеріне көрсеткен сый-құрметке разылықтарын білдірді.

Клара НҰРПЕЙІСОВА

Пікір: