Аудандық Мәдениет үйінде 7 ақпан күні Көкпекті ауданы әкімі Р.Н.Сағындықовтың 2017 жылы атқарылған жұмыстары туралы есептік жиыны өтті. Кездесу жұмысын аудандық мәслихат хатшысы Талғат Сарманов ашып жүргізді. Сонымен қатар жиынға қатысушы Қазақстан Республикасының Президенті әкімшілігінің инспекторы Т.Байзатов, ШҚО әкімінің орынбасары Ш.Байбеков, ауылдық округ әкімдері, ардагер ақсақалдар, шаруашылық басшылары, жеке бөлім басшылары, заң органдарының қызметкерлері, дәрігерлер мен ұстаздар, қарапайым ауыл тұрғындары қатысты. Әдеттегідей, әр жылдың алғашқы айында өткен жылдың қорытындысын шығарып, жаңа жылға тың серпін беретін міндеттер талқыға салынатын әкімдердің есеп беру кездесулері билік пен тұрғындар арасын жақындатып қана қоймай, көкейде жүрген бірқатар түйткілді сұрақтардың оң шешімдерін табуға да жол ашатыны рас.
2017 жылы атқарылған аудан көлеміндегі нақтылы істердің мән-жайын Рамиль Нығметжанұлы өз баяндамасында жеткізе білді. Жаңадан босағадан аттап кірген жылда аудан көлемінде тындырылатын жұмыс жоспарымен таныстырып, жан-жақты талдау жүргізді. Аудан басшысы мақсатты бағытталған берекелі істің нәтижесін, атқарылған жұмыстарды егжей-тегжейлі баяндап, есептік кезеңдегі ауданның негізгі әлеуметтік-экономикалық даму динамикасындағы оң өзгерістерді тізбелеп берді.

1979 жыл 25 желтоқсан және 1989 жыл 15 ақпан. Бұлар тарихта қанды ізі, сан жүректе жазылмас жарасы қалған жылдар мен күндер.15 ақпан ерекше күн, біз бұл күні ерлік пен батылдықтың өлшеусіз үлгісін көрсеткен барлық жерлестеріміз, Ауғанстанның отты жолдарымен өткен ержүрек жауынгерлер алдында тағзым етеміз.
Ауған соғысы ешқашан да естен кетпек емес. Сол соғыста Отан алдында берген анттарына адал болған, өздерінің батылдығы мен жанқиярлығын паш еткен ұлдарын, борыштарын мүлтіксіз атқарған азаматтарды құрмет тұту әрқайсымыздың борышымыз.
Бүгінгі күні ортамызда жүрген ауғандық жауынгерлеріміз бейбіт өмірдегі жарқын істерімен, қоғамдық жұмыстарға белсенділіктерімен, түрлі кәсіпті игерудегі ерен еңбектерімен ерекшеленуде. Олар өскелең ұрпақ үшін отансүйгіштік пен патриоттықтың жарқын үлгісі болуда. Сонау Ауған жерінде қару асынып, мұң арқалаған сын сағаттарда бірін-бірі бауыр дескен азаматтар бүгінгі таңда ауданымыздың түкпір-түкпірінде еңбек етуде.