Тәуелсіз еліміз үшін үшінші жыл қатарынан мереке ретінде тойланып келе жатқан ұлттар мен ұлыстардың татулығы мен бірлігін жаңа деңгейге көтеретін ерекше мереке - Алғыс айту күні. Алғыс айту – ол ең алдымен елімізде тыныштық пен үндестік, өзара сенімділік пен барлық қазақстандықтарға деген құрметтің орнығуына негіз болған Президенттің бейбітшілік пен келісім саясатының салтанатты күні. Елбасы Жарлығымен «1 наурыз - Алғыс айту күні» болып бекітілгені бәрімізге белгілі. Қазақстан халқы Ассамблеясының құрылған күнімен тұспа-тұс келген мереке қарсаңында ұлттар бірлігі нығая түспек. Қайырымдылық, ризашылық, өзара жәрдемдесу сияқты ең құнды адамгершілік қасиеттер көрініс тапқан, сол бір қиын кезеңдерді еске түсіретін тартымды іс шара Көкпекті ауданында Қ.Алтынбаев атындағы Мәдениет үйінде өтті.

Құрметті жерлестер! 

Қазақстан халқы Ассамблеясының «Мәңгілік Ел: бір ел – бір тағдыр» тақырыбымен өткен ХХІІ сессиясының ашылу салтанатында Елбасымыз, Ұлт көшбасшысы Нұрсұлтан Әбішұлы Назарбаев елімізде Алғыс айту күнін мерекелеу туралы айтып, «Қазақстан Республикасындағы кәсіптік және өзге де мерекелер туралы» Қазақстан Республикасы Президентінің 1998 жылғы 20 қаңтардағы № 3827 Жарлығына өзгеріс пен толықтырулар енгізу туралы» Жарлыққа қол қойды.Жарлықта 1-наурыз жылдың ең сыпайы күні, яғни «Алғыс айту күні» болып жарияланды. 
Әрине, жылдың әр күні сыпайы болуға тырысуымыз керек. Алайда, көп жағдайда алғыс айтуды ұмытып, немесе оған ерекше көңіл бөлмейміз. Алғыс сөздерінде бір сиқырлық бар. Олар арқылы біздер бір-бірімізге ризашылығымызды көрсетеміз, көңілімізді бірдіреміз, жақсы эмоциялар сыйлаймыз. Ғалымдардың айтуы бойынша, рахмет сөзін айту адамдар арасында жақсы қатынас орнатады. Алғыс сөздер адам жанын керемет қуанышқа бөлейді, көңілін тыныштандырады, жүрегін жылытады. 

Құрметті көкпектіліктер! 

Көктемнің жаймашуақ күнінде аталып өткелі отырған Алғыс айту күні мерекесімен аудан тұрғындарын шын жүректен құттықтаймын! Бұл мереке көп ұлтты тәуелсіз мемлекетіміздің тұғырын одан ары биіктетіп, халықтар арасындағы достық пен бірлікті нығайта түсетіні анық. Әрбір отбасына ынтымақ пен бірлік, дендеріңізге саулық тілеймін! Адамнан «рахмет» деген сөз есту жақсы, жоғарыдағыдай тілек есту одан да жақсы. Жақсы істердің бастауы - жақсы сөзден басталады. Бір-бірімізге алғыс айтудан шаршамайық! 

Р.Сағандықов, аудан әкімі 
Т.Сарманов, аудандық мәслихат хатшысы