Құрметті оқырман! Қолыңыздағы бұл кітап «Ақжайлау», «Ұмытпа мені, Ақжайлау», «Ұлыны ұлықтау ұлт парызы» ктаптарының авторы Ратбек Арынұлының жаңа туындысы. Автор өзінің өмірден түйгендері мен көрген-білгендерін ой елегінен өткізіп, жаңа шығармасына өзек еткен.

Алғашқы еңбек жолын ұстаздықпен бастаған Ратбек Арынұлы, Ақсуат ауданындағы «Еңбек туы» газетінде журналистік қызмет те қолынан келетінін көрсетеді. Көп ұзамай Көкпекті ауданының «Жұлдыз» газеті редакциясына шақырылып, «Адам және Заң» айдарымен арнайы бет шығару жүктемесін абыроймен атқарады. Кейіннен аудандық партия комитетінің жолдамасымен ішкі істер бөлімінде қызмет етіп, майор шенімен отставкаға шығады.

Қазақ халқының басынан өткен небір «тар жол, тайғақ кешулер» мен қоғамда орын алған келеңсіздіктерге бейжай қарай алмайтын және әділдікті тура айта білетін шыншыл ақынның шығармалары қысқа да нұсқа жазылған. Кітап тілі жатық, оқуға жеңіл, қалың оқырманның көңілінен шығатынына сенімдіміз.

Ел басына қиын-қыстау күн туған заманда есімі ел арасында кең тарағанымен, бұл күндері тарих қойнауында ескерусіз, елеусіз кетіп бара жатқан батырлардың бірі әрі бірегейі ол – Уақ Бармақ батыр. Батырдың қайсар қасиеттерін Кәрібай ақын ерекше жырлағаны елдің есінде, Көкпекті жұртының жадында. Еңселі ердің есімін тарих қойнауынан аршып алып, бүгінгі батыр ұрпақтарына бабаларының есімін тарих беттеріне таңбалап тұрып енгізген шара өтті Көкпекті ауданында.
Ержүрек ердің жатқан жеріне ұрпақтары құлпытас қойды. Үрім-бұтақтары даңқты қолбасшының рухына құран бағыштап, тағзым етті. Биғаш ауылдық округі аумағындағы Қызылбұлақта жатқан Бармақ батыр бабасының басына тәу етуге келген халық пен ұрпақтарының санында есеп жоқ. Ел ағалары мен мәрт меценаттар таза граниттен құлпытас орнатқан. Құлпытастың ашылу салтанатына алыс-жақыннан ағайын көп жиналды. Зират басында құран оқылды. Ұлтына қорған болған ұлы тұлғаның рухына жақсы сөздер айтылды. Үрім-бұтағы тайлы-таяғымен өшпес өнегесі мен өлмес өсиетіне бас иіп, тікесінен тік тұрып тағзым етті.