Көкпекті ауданының бір шетінде томаға-тұйық тірлігімен ерекшеленіп, мамыражай ауыл шаруасымен күнелтіп жатқан Теректі округінде оның барша тіршілігіне белсене араласып жүрген жігіт ағасы тұрады. Ол - ауданымызға танымал, беделді, сыйлы азамат Қанат Бидахметұлы Садықов. Бүгінгі таңда «Теректі» шаруа қожалығының басшысы және аудандық мәслихаттың екі шақырылымындағы депутаттық қызметін қоса абыроймен атқарып жүр. Қанат Бидахметұлы ел-жұрттың сенім артқан арқалы азаматтарының бірі әрі бірегейі екендігін ұғындық. Осы шағын ауылға сүйеніш болып жүрген азаматты сөзге тартқанды жөн көрген едік.

Қазан айы басталғалы ауданның егде тартқан қарт адамдары басты назарда. Оның ішінде Ұлы Отан соғысының ардагерлеріне ерекше көңіл бөлінуде. Аудан әкімі Рамиль Сағындықов, аудандық ардагерлер кеңесінің төрағасы Сләмбек Мұқашев және аудан басшысының орынбасарлары соғыс ардагерлерінің шаңырағында болып, қадірменді қарттарды мерекесімен құттықтады.
Аудан басшысы екі бірдей соғыс ардагері тұратын Ақтас ауылына арнайы ат басын бұрды. Ұлының қолында тұратын соғыс ардагері Нұрмұхамед Ақшалов меймандарды есік алдынан өзі қарсы алды. Биылғы жылы 95 жасқа келген ардагер әлі болса тың. Рамиль Нығметжанұлына бүгінгі жағдайының жақсы екенін жеткізіп, елдің амандығын, жұрттың тыныштығын тіледі. Мереке иесіне жүрекжарды тілегін жеткізген Рамиль Нығметжанұлы - Аға буын өкілдерінің ашық аспан және ел болашағы үшін қажырлы еңбектеріңің арқасында біз тыныш бейбіт өмір сүрудеміз, Сіздердің атқарған еңбектеріңіз қазіргі ұрпаққа үлгі болады, - деп лебіз білдіріп, мерекелік сыйлық табыстады. Құттықтау қабылдаған Нұрмұхамед ақсақал өз кезегінде аудан басшысына алғысын жеткізіп, қонақтарға ризашылығын білдірді.