22-24 қазан аралығында Курчатов кентінде таэквон-до спорты бойынша кадеттер арасында Қазақстаннан Халықаралық чемпионатқа іріктеу кезеңіндегі облыс біріншілігі өтті. Дүбірлі жарысқа Көкпекті ауданынан 10 жас және 12-13 жастағы балалар арасынан 3 спортшы қатысты. Екі бала алтын медальды төсіне тағып чемпион болса, біреуі жүлделі орынды жеңіп алды.
Атап айсақ, Анатолий Бойков пен Сұңғат Ерланов І-орын, ал Ерасыл Бауыржанов ІІІ-орынға лайық болып, қоржындарын алтын және қола медальдармен қомдады. Алтын медаль алып, іріктеу кезеңінен өткен спортшыларымыз 2018 жылдың басында Алматы қаласында өтетін Халықаралық чемпионатқа жолдама алып, Қазақстанның намысы үшін жекпе-жекке түсетін болады.

Өткен жұмада Самар ауылындағы Мәдениет үйінде алғаш рет Лауреат атағының иегері, әр сахнаның көркі, танымал әнші, самарлық Айымгүл Ыхай өзінің өнер жолындағы «Атамекенге тағзым» атты шығармашылық кешін өткізді. Бұл ұйымдастырылған шара самарлықтар үшін бұрын-соңды болмаған үлкен тосын сый болды.
Тамаша концертімен келген Айымгүл халық арасында жақсы танымал әндерімен кештің шымылдығын ашты. Дауыс ырғағының кеңдігін тағы бір дәлелдеген әнші жиналған жұртшылықтың қошеметіне бөленді. Өнер иесі тыңдаушылар алдында 10 жыл сахнада өткен өміріндегі жетістіктерімен бөлісті.

Айымгүл ханым 1977 жылы Монголия Республикасы Алтай ауылында дүниеге келген. Анасы 15 құрсақ көтерсе де, соның ең кенжесі Айымгүл ерекше дара туылды. Айымгүл Ыхайқызының жастайынан өнерге деген құштарлығы әнге деген сүйіспеншіліктен басталған болатын. Әкесімен бірге бес жасынан сахнаға шығып, ән айтып, би билеп, өнерін көрсете бастады. Әкесі Ыхай марқұм «Қара жорғаның» майын тамыза билейтін биші, әнші, сері адам болған. Талай республикалық, облыстық байқауларда бас жүлдеге иеменіп, балаларына қамқоршы, сүйікті әке, аяулы жар бола білді. Айымгүл алты жасында әкесімен бірге Монголияның астанасы Ұлан Баторда өткен «Ұлы дала биі» атты халықаралық би байқауында бас жүлдені жеңіп алды. Сол кезден бастап кішкентай Айымгүлдің әнге деген құмарлығы байқалды. 2011 жылы «Тәуелсіздікке тағзым» жыр мүшәйрасында Айымгүл бас жүлдеге ие болды. Бүкіларалық жәрменке өткізілген кезде Ресейдің Барнаул қаласына дейін барып, ұмытылмас концерт беріп қайтты, сонымен бірге, ауылдық округте ұйымдастырылатын меркелік шараларға Айымгүл міндетті түрде қатысып, сахна төрінен ылғи табылады.

Спорт – денсаулық кепілі. Сондықтан әлемде қаншама адам спортпен шұғылданып, бар ғұмырын соған арнайды. Әлемде ең көп тараған, ерекше ықыласқа ие спорт түрі – футбол екені анық. Ал, біз білмейтін спорт түрлері қаншама?! Адам баласының қиялы шексіз дегенді жиі айтамыз. Иә, расында да әр күн сайын таңданыс тудыратын жаңа нәрселерге куә болып жатамыз. Адамдар жаңалыққа, ерекше бірдеңе ойлап табуға құмар болып келеді. Бір-ақ мәрте берілетін өмірді қызықты етіп сүру үшін түрлі қадамдарға барады.

Жаттықтырушы Руслан Жүнісовтың шәкірттері Қарағанды қаласында өткен «Алтын бала» әлем чемпионатының 2 күміс және 1 қола жүлдесін еншіледі. NOMAD MMA аралас жекпе-жек өнері бойынша өткен жарыста Көкпекті орта мектебінің оқушылары Ансар Болатов қола медаль, Динияр Галиев пен Ернұр Қайырлы күміс медаль жеңіп алды.
«Алтын бала» чемпионатын Nomad MMA Бүкіләлемдік федерациясы және Қазақстанның жекпе-жек өнері Республикалық Одағы ұйымдастырған. Турнирде 17 елден келген 10-17 жас аралығындағы 530 спортшы бала бақ сынас-ты. Елімізде Nomad аралас жекпе жек өнерінің ең алғаш таралған аумағы болып саналатын Қарағандыда өткен жарысқа біздің ауданнан барлығы 23 бала қатысты.