Биыл ауданымыздағы «Жасыл ел» жасағына 35 квота бөлініп, онда 35 сарбаз еңбектенуде. Бағдарлама жастар үшін жазғы демалыс уақыттарын көңілді әрі пайдалы өткізуге зор мүмкіндік болып отыр.
«Жасыл ел» жасағының жұмысын ұйым-дастырушы Азамат Қалықовтың айтуынша, биыл Көкпекті ауылында 25, Самар ауылында 10 жас өрен аудан мен елді мекендерді көгалдандыру мен көркейту және абаттандыру жұмыстарының бел ортасынан көрінетін болады. Жасақ тобының құрамында студент, жұмыссыз және ата-анасының рұқсатымен алынған оқушы жастар бар. Әрине оның бәрі тегін емес, ақылы түрде жүргізіледі. Яғни «Жасыл ел» жасағының мүшелері айына 60 мың теңге көлемінде еңбекақы таба алады. Олар жазғы демалыстарын көңілді ғана өткізіп қоймай, отбасыларына қаржылай қолдау көрсетуге ниетті.

Астана күні – Тәуелсіз ел тарихындағы айтулы мереке. Сәні мен салтанаты келіскен бас шаһардың туған күніне орай жыл сайын дәстүрлі түрде өңірлерде іс-шаралар ұйымдастырылып келеді.
Елордамыз Астана қаласының 20 жылдық мерекесіне орай 5 шілде күні Қалихан Алтынбаев атындағы аудандық мәдениет үйінде салтанатты жиын өтті. Сарыарқа төсінде ерекше сән-салтанатымен бой көтерген әсем қала-бар алаштың астанасына арналған салтанатты жиынның беташары «Толағай сазы» ұлт аспаптар ансамблінің орындауындағы «Серпер» күйімен ашылды. Мемлекеттік Әнұран шырқалды.

Домбыра – көнеден қалған асыл мұра, көзіміздің қарашығы әрі ұлттық кодымыздың айнымас бөлігі. Жуырда Мемлекет басшысы Нұрсұлтан Назарбаев Ұлттық домбыра күні туралы Жарлыққа қол қойған болатын. Құрманғазы, Тәттімбет, Дәулеткерей, Қазанғап, Дина, Сүгір сынды бабаларымыздан мирас болып қалған күй өнерін жандандыруда бұл күннің алар орны ерекше. Алпыс екі тамырды идіріп, ет жүректі елжіреткен қоңыр домбыраның киелі үні кез келген жан баласын таңғалдырмай қоймас.
Елбасы Жарлығымен Қазақстанда тұңғыш рет шілденің алғашқы жексенбісі Ұлттық домбыра күні болып белгіленді. Осыған орай қазақтың жаны болып табылатын халықтық аспаптың құрметіне арналған мерекелік шаралар Көкпекті ауданында кеңінен тойланды.

«MEN QAZAQPYN» дәстүрлі әншілер, термешілер мен күйшілердің телевизиялық Мега жобасының іріктеу кезеңінің концерті Көкпекті аудандық мәдениет үйінде өтті.
Өз өнерлерін сынатуға көкпектілік Бұлбұл Өмірсерік, Томан Рәпилә, Әли Жанғасинов, Фархат Маратұлы, Манарбек Бекішов, тассайлық Біржан Байжұманов, биғаштық Айжан Дүнгененова, преображенкалық Айдын Хұмырбек, құлынжондық Ниязбек Жанабаев қатысты. Өнерлі жастардың орындаушылық қабілеттерін, сахнада өзін-өзі ұстай біліп, көрерменді баурай алуларын бағалау Шығыс Қазақстан Облыстық «Алтай» телевидениесінің директоры Айда Жабағиева бастаған, құрамында Әлібек Саржанов, Дархан Бердібек, Асқар Сүлейменов бар қазылар алқасына жүктелді.