Көкпекті аудандық ауруханасында халыққа медициналық қызмет көрсету сапасын арттыру мақсатында бірқатар құрылыс-жөндеу жұмыстары жүргізілуде. Бұл жұмыстар емдеу мекемесінің материалдық-техникалық базасын нығайтып қана қоймай, емделушілер мен медицина қызметкерлеріне қолайлы жағдай жасауға бағытталған.

Атап айтқанда, аурухананың кіреберіс тобы мен баспалдақтары толықтай қайта жаңартылып, қазіргі талаптарға сай жөнделді. Бұл өзгерістердің нәтижесінде жедел жәрдем көліктері қабылдау бөліміне кедергісіз тікелей кіре алатын болды. Мұндай шешім науқастарға алғашқы медициналық көмекті дер кезінде көрсетіп, емдеу процесінің тиімділігін әрі жылдамдығын арттыруға жол ашады.
Бүгінде аурухана аумағында есік-терезелерді жуу, тазарту жұмыстары жүріп жатыр. Сонымен қатар, мекеме ғимаратына мемлекеттік рәміздер орнатылып, елдік реңк айшықталуда.
Қазіргі таңда нысанның сыртқы қасбетін жаңарту жұмыстары қызу жүріп жатыр. Жоспарға сәйкес, қасбетті толық жөндеу 15 тамыз күніне дейін аяқталмақ.
Жүргізіліп жатқан бұл жұмыстар – медициналық қызмет сапасын жақсарту жолындағы нақты қадамдар. Жаңартылған аурухана – тұрғындарға жайлы жағдай жасап қана қоймай, денсаулық сақтау жүйесінің даму деңгейін көрсететін маңызды көрсеткіш.

Көкпекті аудандық әкімдігінің баспасөз орталығы

Пікір: