5 наурыз күні Абай облысының әкімі Берік Уәли 8 наурыз - халықаралық әйелдер мерекесі қарсаңында түрлі салада еңбек етіп жүрген өңірдегі нәзік жандылармен кездесті. Салтанатты шараға өңірдің қала-аудандарындағы білім, ғылым, мәдениет, спорт, денсаулық сақтау, құқық қорғау, ауыл шаруашылығы, кәсіпкерлік саласының, БАҚ, азаматтық қоғам өкілдері, Президент жанындағы Ұлттық комиссия мүшелері қатысты.

Жалпы саны 100-ге жуық нәзік жандылардың басын қосқан салтанатты шарада жұмысшы мамандарына ерекше көңіл бөлінді. Кездесуге ауданымыздан жеке кәсіпкер, аудандағы табысты қолөнер шебері, "Өз ісінің шебері" номинациясының иегері Жанна Жабекова және Көкпекті ауылында 5 адамды жұмыспен қамтып отырған белгілі наубайханашы Қарлығаш Аубакирова, ішкі саясат бөлімінің бас маманы, Көкпекті ауданы әкім жанындағы әйелдер істері және отбасылық демографиялық саясат жөніндегі комиссия хатшысы Қымбат Сейткамзина және Көкпекті аудандық оқушылар шығармашылық сарайының қосымша білім беру педагогы Назым Келербекова қатысып, керемет кештің мейманы болып қайтты.
Облыс әкімі құттықтау сөзінде әйелдердің отбасының ұйытқысы болып қана қоймай, елімізде жүргізіліп жатқан ауқымды саяси және әлеуметтік-экономикалық реформаларда белсенді азаматтық ұстаным танытып жүргенін атап өтті.
«Мемлекет басшысы Қасым-Жомарт Кемелұлы Тоқаев «Әйелдерге жан-жақты жағдай жасау, олардың құқығын қорғау және отбасы институтын нығайту – мемлекеттік саясаттың негізгі басымдығы» екенін үнемі назарда ұстап келе жатқаны баршаға мәлім. Қазақ даласында әйел затының орны қашанда биік. Бесікті тербеткен, елді жебеген, ердің серігі болған аналарымыз – халқымыздың ұйытқысы, шаңырағымыздың шамшырағы. Өңіріміздің өркендеу жолында атқарған адал қызметтеріңіз үшін шынайы алғысымды білдіруге рұқсат етіңіздер»,- деді облыс әкімі.
Салтанатты шарада Қазақстанның Еңбек ері Алма Шүкіжанова, мемлекеттік қызмет ардагері, қоғам қайраткері Нина Рыболовлева, Президент жанындағы әйелдер істері және отбасылық-демографиялық саясат жөніндегі Ұлттық комиссия мүшесі Риза Молдашева құттықтау сөз сөйлеп, лебіздерін жеткізді.
Облыстық филармония және қалалық мәдениет сарайының шығармашылық ұжымы жиналғандарға мерекелік бағдарлама ұсынды.

Пікір: