Ұлтымызда «нанды аяққа баспа, жерге тастама, үстінен аттама киесі атады» дейтін ұлы ұғым  бар. Дастарханымызда ас атасы мол болған сайын еліміздің берекесі тасып, ырысы молаятыны белгілі. Қазір киелі саналатын,дастарханның берекесін келтіретін нан өніміне күн өткен сайын сұраныс көбейюде. Ауданда өзінің қаражатына  шағын  наубайхана ашып, несібесін көріп отырған  кәсіпкерлер саусақпен санарлық қана. Бұл кәсіп қызық болып, редакция тілшілері аудан орталығындағы жұртшылыққа «Қарлығаштың наубайханасы» деп танылған кәсіпкердің жұмысымен танысып қайттық. 

Әрине, мақсатымыз наубайхана жұмысымен танысу, ел аузындағы дәмді нанның құпиясын білу болды. Наубайхана ішінде қызу жұмыс. Бір кісі қамыр илеп жатса, екіншісі дайын қамырды қалыпқа салып, пешке орналастырып әлек.

Кәсіп иесі - Қарлығаш Аубакирова. Осы шағын наубайханасын 2 жылдан бері дөңгелетіп отырған кәсіпкер. Жолдасы өмірден өтіп, мойнына екі баласының жауапкершілігін арқалаған ана. Негізгі кәсібіне жұмыссыз кезінен кіріскен ол алдымен үйде отырып нан пісіре бас-тайды. Нан, тоқаш, бауырсақ жасап дүкен сөрелеріне қойған. Уақыт өте келе ешқандай мемлекеттің көмегіне жүгінбей, өзі несие рәсімдеп, серіктесі Қуат Рахметов екеуі бірігіп осы наубайхана жұмысын қолға алады. Қазіргі таңда шағын наубайханада 7 тұрғынды жұмыспен қамтып отыр.
- Бұл істі осыдан 2 жарым жыл бұрын осы ғимаратты жалға алып,жұмысымды бастадым. Кәсіп тоқтап қалмай, жұмысын істеп тұр. Осы бағытта біраз қиыншылықта өтті басымыздан. Алған несиемізді, жалдап отырған ғимараттың ақшасын төлей алмай, тіптен ұн сатып алуға қаражатымыз жетпеген кездер болды. Қазір жаман емес, өнімі-мізді аудан дүкендеріне, сондай-ақ Үлкенбөкен,Қарамойыл ауылдарына жібереміз. Күніне 6-7 қап ұн жаратып, 1000 бөлке жасаймыз. Бәрі кешке дейін сатылып кетеді, кейде тапсырыстан бөлек нанымыз жетпей қалып жатса, тұрғындар ренішін айтады. Сүйген ісіңнен нәтиже көріп жатсаң, содан артық қуаныш бар ма.
Наннан бөлек лаваш,қара нан,тоқаш, бауырсақ,багет,батон пісіреміз. Тіптен, тұрғындардан қатым,ас беру кезінде жеті шелпекке,бауырсаққа тапсырыс түседі уақытында жеткізіп береміз,- дейді Қарлығаш Тұмарбекқызы.
Қызығы 50 кг ұннан күніне 6,7 рет нан иленеді 100-ден аса бөлке шығады. Әр партия 45 минутта дайын болады. Сонымен қатар кәсіпкер ұнды Семей қаласынан төмен бағада алдырады. Айта кетейік, бұл наубайхананың өнімдері ауданымыздың «Gulzhanat market» сау- да дүкенінде және «Вайнах», «Алуа», «Фархат», «Нұр», «Аққу», «Солнечный», «Заречный» дүкендерінде бар. Күн са-йын таңертеңгі 10 кезінде және түстен кейін 14:30 да нан дүкендерге жеткізіледі.
Бүгінде біраз нан өнімін жасауды үйреніп алдым. Сүйіспеншілікпен жасалған нанымызды тұтынушылар мақтап жатады, қуанып қаламын. Жалақым жақсы, ең бастысы, тұрақты, – дейді наубайхана қызметкері Талшын Сейітова.
Кәсіпкер Еңбек күніне орай аудан әкімінің Алғыс хатымен марапатталған. Алдағы уақытта кәсіпкердің жоспары көп. Мемлекеттен қосымша қаржылай қолдау тауып жатса, наубайхананы кеңейткісі келеді.

Пікір: