Көкпектілік жас спортшылар Бексұлтан Маратов пен Ерназар Назарбеков ITF таэквондодан бірінші Орталық Азия чемпионатының жүлдегерлері атанды. Спортшыларды білікті бапкер Бақыт Ғазизұлы Рахимов жаттықтырады.
28 наурыз күні аудан әкімі Ділдәбек Оразбаев жас таэквондошылармен және олардың бапкерімен кездесті. Қабылдауға сондай-ақ жаңадан тағайындалған №1 БЖСМ директоры Дулат Тұрлыбеков қатысты.
Кездесу барысында Ерназар Назарбеков аудан әкімі Ділдәбек Тәжібайұлына Астана қаласында болатын таэквондодан алдағы Әлем чемпионатына да-йындалып жатқандары туралы айтып өтті. Жас спортшының айтуынша, олар өздерінің барлық шеберліктерін көрсетіп, жоғары нәтижелерге қол жеткізуге ниетті. Биылғы жылы Қазақстан Республикасы таэквондодан бірінші рет әлемдік біріншілік өткізеді.

Аудан басшысы Ділдәбек Оразбаев балалармен әңгімелесіп қана қоймай таэквондо үйірмесінің бүгінгі тыныс-тіршілігін сұрап, жаңа спорттық жетістіктер тіледі. Сондай-ақ аудан басшысы жоғары санатты жаттықтырушы, халықаралық дәрежедегі төреші Бақыт Рахимовтың аудандық спорт саласына қосқан үлесі зор екенін атап өтті. Жиын соңында Бексұлтан, Ерназар және Бақыт Ғазизұлына аудан басшысы бағалы сыйлықтар мен ақшалай сый табыстады.
Турнирге тоқталсақ. 16-19 наурызда Өзбекстан астанасы Ташкент қаласында таэквон-до ITF бойынша бірінші Орталық Азия чемпионаты өтті. Жарыс ұйымдастырушылары Халықаралық таэквон-до ITF федерациясы, Өзбекстан Республикасының жастар саясаты және спорт министрлігі, Орталық Азия таэквон-до ITF Федерациясы және Өзбекстан ұлттық таэквон-до ITF қауымдастығы болды.
Турнирге Түрікменстан, Тәжікстан, Қазақстан, Өзбекстан және Қырғызстан елдерінің құрама командалары қатысты. Спортшылардың жалпы саны 450 адамды құрады. Қатысушылардың жасы 11-13 жас (кадеттер), 14-15 жас (жасөспірімдер), 16-17 жас (жасөспірімдер) және 18+ (ересектер) болды.
Осы мәртебесі биік жарысқа жаттықтырушы Бақыт Рахимов жаттықтыратын көкпектілік спортшылар да қатысты. Лайықты қарсыластармен өткізген күш сынасқан Бексұлтан Маратов 3-ші орынды иеленді, Ерназар Назарбеков 2-ші орынға ие болды.
Айта кетейік, Бақыт Ғазизұлының өзі ұйымдастырушылар тарапынан төреші ретінде шақырылып, турнирдің үздік жеті төрешісінің қатарына енді.
Қазіргі уақытта таэквондошылар Әлем чемпионатына жолдама сарапқа салынатын Шымкент қаласында өткізілмек ел чемпионатына қызу дайындық үстінде.
Жаттықтырушы мен жас спортшылар ата-аналар комитетіне, атап айтқанда Юрий Виничукке жарыстарға қатысу үшін іс-сапарға қаржылай көмек көрсеткені және қолдау білдіргені үшін шын жүректен алғыс білдіреді.
Жаттықтырушы мен оның жеңімпаз шәкірттерін кезекті жеңістерімен шын жүректен құттықтаймыз!

Пікір: