Теректі ауылындағы орта мектеп жанынан шағын орталық ашылатын болды. Бұл туралы Ұлы Отан соғысының батыры Қойгелді Аухадиев атындағы орта мектебін аралау барысында аудан әкімі Ділдәбек Оразбаев мәлімдеді. Аудандық білім бөліміне 2023 жылдың 1 қаңтарынан бастап шағын орталық жұмысын іске қосу туралы тапсырма берілді.

Аудандық білім беру бөлімінің әдіскері Қажет Жүнісбеков мектептің жағдайымен таныстырып, бүгінгі тыныс-тіршілігі туралы мәлімет берді. Қойгелді Аухадиев атындағы орта мектебі 522 балаға арналған. Қазіргі уақытта мектеп қабырғасында 115 бала білім алуда.
Мемлекеттік-жекешелік әріптестік аясында Теректі ауылында 1 балабақша қызмет етеді. Аталған балабақша 40 балаға арналып салынған. Бүгінгі күні онда 40 бала тәрбиеленуде. Осы уақытта Теректі ауылында мектеп жасына дейінгі 20 бүлдіршін балабақшада орын болмағандықтан үйде тәрбиеленуде.
Аудан әкімі Ділдәбек Оразбаев мектеп жасына дейінгі бүлдіршіндерді тәрбиемен қамтудың маңыздылығына тоқталып, олар үшін барлық жағдай жасау керектігін айтты.
- Ауылда балабақша болғаны жақсы. Алайда ол балабақшада орын болмағандықтан 20-дан астам бала үйде отыр. Біз бұл жағдайды қалай да шешу керекпіз. Ол үшін мектеп ғимаратының мүмкіндігін пайдаланған абзал. Осы орайда орынбасарым Марат Теміржановқа аудандық білім бөлімі және мектеп әкімшілігімен бірлесіп, мектеп жанынан шағын орталық ашу жұмысын ұйымдастыруды міндеттеймін, - деді Ділдәбек Тәжібайұлы.
Теректі ауылындағы «Еркенұр» жекеменшік балабақшасы 2014 жылы ашылған. Балабақша меңгерушісі Индира Сәрсембаева. Бүлдіршіндер 2 топта тәрбие алуда.

Пікір: