Жыл басы тәуелсіздігіміздің, халқымыздың бірлігінің сыналған кезеңі болып басталды. Тұтас елдің басына туған сын сағатта тәуелсіз елдің ұрпағы бір-бірін қорғап, қолдап ауызбірлік танытқандығының арқасында бұл қиын кезеңді де еңсерудеміз.
Міне, осындай қиын шақта, халыққа қолдан келгенше көмек қылған жандар жетерлік. Мысалы, Самар орталық мешітінің имамы Бекболат қажы Қалебайұлы қайырымдылық айлығында халықтың әлжуаз топтарының өкілдеріне үнемі қайырымдылық көмек көрсетеді. Ораза айт мерекесі күндері, Құрбан айтта өз атынан қайырымдылық түскі ас береді.

Осы жаңа жылдың басында бүкіл ел бойынша төтенше жағдай жарияланды және халықтың денсаулығы мен өмірін сақтау мақсатында қалалар мен ауылдарға кіру кезінде блокпосттар қойылды. Мұндай блок-бекет Самар ауылына кіреберісте Самар-Тарғын-Өскемен тас жолында орнатылған.
Самар ауылдық округі әкімшілігі тәртіп сақшыларын ыстық тамақпен және ыңғайлы, жылытылатын орынмен қамтамасыз ету бойынша шаралар қабылдады. Самар ауылындағы орталық мешітің имамы Калебай Бекболат қажы зайыбы Мейрамгүл екеуі Самар – Өскемен тас жолында орналасқан блокпосттағы сарбаздарға ыстық тамақ пен азық-түлік салынған себеттерді үлестірді.
«Мемлекетіміз елімізде болған жағдайды қалыпқа келтіру үшін, елге жайлы тіршілікке оралу үшін қажетті шешімдер қабылдап, тиісті іс-шараларды жүзеге асыруда. Біздің де аз да болса үлесіміз болсын деген ниетпен сарбаздарымызға ас-су әкеліп, оларға рухани тұрғыдан қолдау көрсетіп жатырмыз. Алла Тағала еліміздің шетін жаудан, ішін даудан сақтасын» деп атап өтті.
Біз діни қызметкердің тілектеріне қосыламыз және баршаңызға бейбітшілік пен тыныштық тілейміз!

#күшімізбірлікте

Пікір: