Екі айдан астам уақыт бойы Лайлы су қоймасында шлюзді жөндеу жұмыстары жүргізіліп жатыр. Су қоймасында болып, жөндеу жұмыстарының барысымен танысып қайттық.

Лайлы су қоймасының шлюзін жөндеу жұмыстары неліктен қолға алынды? Су қоймасының бөгеуі қайта салынып, жаңа шлюздердің тартылғанына 10 жылдай ғана уақыт өтті емес пе?
- Шлюздің қабырғалары қаусырап жарылып кеткендіктен оны ауыстыру қажеттілігі туындады. Екі ай бойы биіктігі 2 метр болатын қабырғаларды ауыстыру жұмыстары атқарылды. Қазіргі уақытта шлюздерді орнату бойынша дәнекерлеу жұмысы жүргізілуде. Су қоймасында 2 жаңа шлюз болады, - дейді дәнекерлеу жұмысының шеберлері.

Аудан әкімі Раджан Сейтқанов Самар ауылына жұмыс сапарының барысында Лайлы су қоймасына барып, жөндеу жұмыстарымен тікелей танысқан болатын. Мердігер ұйымның жұмысына жоғары баға берген аудан басшысы жоба толық аяқталғанша тікелей бақылау жасайтынын айтқан еді.
Су қоймасының әрбір бөлігінде атқарылып жатқан жұмыстар туралы учаске шебері Шалқар Сейітқазыұлы баяндап берді.
- «Халық Строй Астана» ЖШС кәсіпорны тендер нәтижесі бойынша су қоймасын қалпына келтіру жұмыстарымен айналысады. Су өткізу үшін жаңа шлюздер орнатылады. Бөгеуді қайта қалпына келтіру жұмыстары толық атқарылды. Сондай-ақ, Ешкібай су қоймасы арнасын толықтай тазалау жұмыстары жасалуда. Құрылыс жұмыстарына 6 адам тартылған, қазіргі уақытта 3 газ-электр дәнекерлеуші маман жұмыс істеуде. Нысанды су қоймасы теңгерімінде тұрған «Шығыс Су қоймалары» ЖШС қабылдап алады. Барлық жұмыстар он күннің ішінде толық аяқталады.

Пікір: