8 қазан күні аудан әкімі жұмыс сапарымен Мойылды және Жұмба ауылдарына барды.
Мариногорка ауылдық округіне қарасты шағын елді мекендердің бүгінгі тыныс-тіршілігімен танысып, болашаққа жоспар жасады.
Мойылды ауылындағы 2014 жылы жабылған мектеп ғимараты құлазып тұр. Ауылдағы оқушылар Мариногорка ауылына арнайы көлікпен тасымалданады. Соңғы жылдары спорттық–сауықтыру лагері ретінде қолданылып келген ғимарат биылғы жылы коронавирус індетінің салдарынан мүлдем іске қосылған жоқ. Лагерьде 4 маусыммен 200-ге жуық оқуышы демалысын ұйымдастыруға мүмкіндік бар. Бүгінде бос тұрған ғимараттың спорт залы мен бөлмелердің төбесінен су ағып, едені түсіп кеткен. Аудан басшысы Серікқазы Садуақасов ауылдық округ әкімі Қайдар Сұрашевқа ғимараттың төбесі мен еденін жөндеуге жоба дайындауды тапсырды.

Жұмба ауылы Қалба тауының қалың қойнауында орналасқан. Табиғаты қатал, қысы қатты ауылда туған жерін шынайы сүйетін еңбекқор жандар мекен етеді. Көктемде соққан қатты дауыл ауылдағы мәдениет ошағының шатырын ұшырып кеткен екен. Төбесінен жаңбыр суы тамшылап тұрған клуб үйінің ғимаратын көзімен көрген Серікқазы Құсайынұлы күрделі жөндеу жұмыстарына жоба дайындап, келесі жылға қаражат бөлу мәселесін қарастыратынын айтты.
Мектеп ғимаратының қасбеті мен сыртын заманауи үлгіде қаптап, есік-терезесін жаңарту бойынша білім беру бөлімінің маманы Гаухар Кәрібаеваға тапсырма берілді. 36 оқушы білім алатын мектептің әкімшілігіне санитарлық талаптарды сақтап, оқушылар денсаулығына баса мән беру керектігі айтылды.
Шалғай жатқан шағын ауылдың орталық көшесіне жарық шамдарын орнату мәселесі де назардан тыс қалмады. Ауылдық округ әкімі Қайдар Сұрашев жергілікті салық түсімдерінен мәселені шешуге қаражат қарастырмақ.

Пікір: