Жанна Жабекова  арманын орындауға деген талпынысы, өз күшіне күмәнмен қарайтын әрбір жан үшін үлгі боларлықтай. Басына  түскен қиыншылыққа қарамастан, қайсар арудың сағы сынған жоқ. Бүгінгі  таңда  сүйікті ісін тапқан Жанна жұмсақ ойыншықтар, әдемі себеттер жасаумен айналысатын тігін шеберханасымен көпке үлгі-өнеге. Қол өнер бұйымдары бүкіл Қазақстанға ғана емес, сонымен қатар шет елдерге де танымал. Жанна - «Қазақстанның үздік тауары» байқауының қорытындысы бойынша «Халық таңдауы» сыйлығының иегері.

22 қыркүйекте аудан әкімі Серікқазы Садуақасов Жанна Жабекованың тігін шеберханасында болды. Бұл Жанна есімі біздің аудандағы көпшілікке таныс, өйткені оның жұмыстары бірнеше рет түрлі масштабтағы қолданбалы өнер көрмелерінде ұсынылды.
Аудан басшысы алдымен қолөнершінің шағын, бірақ өте қолайлы шеберханасымен танысты. Сөрелер шебердің және оның шәкірттерінің туындыларына толы. Серікқазы Құсайынұлы Жанна Берікбекқызының шеберлігіне тәнті болып, жасаған жұмыстарын жоғары бағалады.
Өз әңгімесінде тігінші қыз қазіргі хоббиі туралы айтты. Ол өз қолымен жасалған қорғаныс маскалары мен киімнің кішігірім жөндеуі қазіргі кезде үлкен сұранысқа ие екенін атап өтті.
Сондай-ақ Жанна алдағы уақытта республикалық «BUSINESS LADY QAZAQSTAN» байқауына қатысатындығын алға тартты.Бұл сайыс елдің табысты дамуындағы әйелдердің ерекше рөліне, белсенді өмірлік ұстанымын кеңінен насихаттауға, әйелдердің бизнестегі рөлін тануға, кәсіпкер және көшбасшы ретіндегі әлеуетін ашып көрсетуге, байқауға қатысушылардың шығармашылық әлеуетін ашуға бағытталған.
Осы шараға қатысуына Серікқазы Садуақасов қолдау білдіретінін айтып, көмектесуге уәде берді. Сайысқа Жанна анасы Руфа және ішкі саясат бөлімінің бастығы Азамат Халықовпен аттанбақ.
Кездесу соңында аудан басшысы Жаннаға қолдауын білдіретін естелік сыйлық - жылы көрпе сыйлады.

Пікір: