28 ақпан күні Көкпекті ауданының тарихи-өлкетану мұражайында «Рухани жаңғыру» бағдарламасының аясында әлемге әйгілі ойшыл, философ, социолог, математик, физик, астраном, ботаник, лингвист, логика, музыка зерттеушісі Әбу Насыр әл-Фарабидің 1150 жылдығына арналған шағын танымдық-көрме өткізілді. Мұражай қорының сақтаушысы К.Смаилова жүргізген шараға Көкжайық орта мектебі мен Көкпекті аудандық балалар өнер мектебінің оқушылары қатысты. 

«2020 жылы әлемнің екінші ұстазы атанған Әбу Насыр әл-Фарабидің 1150 жылдығы ЮНЕСКО көлемінде аталып өтіледі. 2019 жылдың 26 тамызында ҚР Президенті Қасым-Жомарт Тоқаевтың 133-ші жарлығында күллі түркі елінің мақтанышы, әлемнің екінші ұстазы, ғалым, философ Әбу Насыр әл-Фарабидің 1150 жылдығын мемлекеттік деңгейде атап өту туралы қаулы жариялады. 2020 жылы өтуі тиіс ауқымды шараға байланысты Қ.К.Тоқаев әл-Фарабидің 1150 жылдық мерейтойына дайындалу және өткізу жөніндегі мемлекеттік комиссия құру туралы қаулыға қол қойды», - деді сөз басында аудандық тарихи-өлкетану мұражайы қорының сақтаушысы Клара Рафикқызы. Одан әрі оқушыларды әл-Фарабидің өмірімен, шығармашылығымен таныстыру мақсатында «Әл-Фараби – өркениет философы» атты деректі фильмді назарларына ұсынды.

Келесі кезекте, шараға қатысып, «Әл-Фараби және оның мұралары» атты кітап көрмесін ұсынған аудандық кітапханашылар Әйгерім Маханова мен Айнұр Зарипова өздерінің қысқаша баяндамаларын оқыды.
Мұражайдағы шағын танымдық-көрме «1 нау-рыз - Алғыс айту күніне» арналған аудандық балалар өнер мектебі оқушыларының әзірлеген әр ұлт өкілдерінің қазақ халқына алғыс айту өлең шумақтарымен қорытындыланды.

Айдын ТОҚСАНОВ

Пікір: