«Самар» коммуналдық шаруашылығына 2 бірлік жаңа техника сатып алынды. 23 шілде күні жұмыс сапарымен Самар ауылында болған аудан әкімі Асхат Смаилов коммуналды техниканы көріп, тізгін ұстаған механизаторлармен кездесіп, ауыл ақсақалдарымен кеңесті.

Мәдениет үйінің алдына арнайы қойылған техника жанында ауданның құрметті азаматы Баянды Қожамбетов, Самар ауылдық ардагерлер кеңесінің төрағасы Айдархан Садықов, ауыл әкімі Ахмет Күдербаев әңгіме-дүкен құрып, ойларын ортаға салды. Жаңа техника Самар ауылын абаттандыруға, көшелердің көркін кіргізуге мүмкіндік беретіні айтылды. Аудан әкімі кәсіпорын басшысы Марат Дюсюповке басым бағыттарды белгілеп, бірқатар міндеттер жүктеді. Тәжірибесі мол ақсақал Баянды Кәкенұлы аудан басшысының коммуналды шаруашылықтың техникалық базасын нығайтып, жұмысын жандандырып жатқанына құптарлық білдіріп, тұрғындар игілігі үшін атқарылар шаруаларға сәттілік тіледі.
Заманауи «Погрузчик» жүктеу техникасы мен «Камаз» маркалы жүк көлігі коммуналдық шаруашылықтың жұмысына пайдалануға берілді. Жалпы құны 46 миллион теңгені құраған техниканы алуға қажетті қаражат аудан бюджетінен бөлінген болатын.
- Жеткізілген көліктердің техникалық жағдай-лары өте жоғары. Алдағы уақытта нәтижесін көреміз. Кәсіпорын иелігіндегі ескірген көліктермен салыстырғанда бұл көліктер көпсалалы. Қолға алған шаруаны сапалы әрі уақытылы орындауға өте қолайлы»,- дейді «Самар» коммуналдық шаруашылық директоры Марат Ержанұлы.
Кездесу соңында аудан әкімі Асхат Сайдахметұлы аудан ішіндегі жолдарды жөндеу және ауылдарды абаттандыру жұмыстарын кешіктермей атқару қажеттігіне баса назар аударды. Самар ауылдық округінің әкімі А. Күдербаевтың абаттандыру жұмыстарын ұйымдастыру барысына сын айтылды. Ғимаратарды түнгі жарықтандыру, көше бойында қаулап өскен арамшөптің көзін жою, жарық шамдары бағандарын түзету және бояу сынды шаруалар салғырт атқарылған.
Коммуналды шаруашылық техникасы жуық күндері Палатцы ауылындағы тозығы жеткен ғимараттар мен құрылыс қалдықтарын жоюды бастайды.

Дархан БЕРДІБЕК

Пікір: