Ретро әндерге күні бүгінге дейін жұрттың ықыласы ерекше. Мәнді де ырғақты әуендер өткен күннен сыр шертетін тамаша сәттерді тағы бір еске түсіруге ықпал ететіндігі сөзсіз. 

Ағымдағы жылдың 19 сәуір күні Көкпекті ауылында Тарбағатай ауданының «Ақжар» мәдениет үйі әртістері «Күндер мен жылдар» атты 70-80 жылдардың танымал әндерін ансамбльдің сүйемелдеуімен шырқап, көрермен қауымға ерекше сый тартты.
Жұртшылықты ретро әндермен сусындату мақсатында ұйымдастырылған кешке аудан тұрғындары көптен күткендей. Аудан орталығындағы Қалиқан Алтынбаев атындағы мәдениет үйі көрерменге лық толды. Кешті бас-тап келген «Ақжар» мәдениет үйінің директоры Болат Айтмұхамбетұлы Құсайынов. Болат Айтмұхамбетұлы спортты жанына серік етіп, өнер көшін басқарып жүргеніне 5 жылдай уақыт болыпты.

- «Ақжар» мәдениет үйінде жалпы 42 адам еңбек етеді, бүгінгі кешке 15 шақты өнерпаз келді. Гастрольдік сапармен Зайсан ауданында болдық, енді Қ.Қайсенов кентіне баруды жоспарлап отырмыз. Сонымен қатар, осы сәтті пайдаланып Көкпекті ауылының азаматтарына қонақжайлылықтарына ризашылығымды білдіргім келеді, - деп өз ойын білдірді. 
Сахана шымылдығы ашылып, ансамбль өткен ғасырдың танымал әндерінен шашу шашты. Ретро-әндерді тамылжыта орындаған оларға тәнті болған көрермендер әсем әндерді қосыла шырқап, кеш ажарын аша түсті. 
Ән кеші аяқталған соң аудан әкімінің орынбасары М.Теміржанов аудан басшысы Асхат Сайдахметұлының атынан құттықтау сөзін арнап, сый-сияпат көрсетті. Осылайша ретро әндер кеші аудан орталығында дүркіреп өтті.
Мен осы кешті тамашалаған барша көрермендер атынан тарбағатайлық өнер-паздарға, ұйымдастырушыларға алғыс айта отырып, оларға осындай концерт, осындай басқосудың Көкпекті төрінде әр жыл сайын қайталанғанын қалайтынымызды жеткізгім келеді.

Клара ҚАЙЫПЖАНҚЫЗЫ

Пікір: