Мейіргүл Мұралбек, Ж.Шайжүнісов атындағы орта мектебі, қазақ тілі мен әдебиеті пәнінің мұғалімі:
- Тәуелсіздік тәңірдің берген тәтті сыйы десек, оны сақтап, келешек ұрпаққа жеткізу ел көшін бастаған Елбасымыздың елеулі еңбегі екенін ешкім жоққа шығара алмас. Олай дейтініміз, саяси көзқарасы қалыптасқан, жаңалық атаулыны қалт жібермейтін қырағы көз қазақ, қазақ қана емес-ау әлем халқы Қазақстанды егемендік алған алғашқы жылдардан бастап небір қиын қыстау сәттерден, сын сағаттардан ел президенті Нұрсұлтан Әбішұлының сындар-лы саясаты арқасында өткенін жақсы білетіні анық.

Демек, елім дейтін елағасына ерім дейтін ел лайықты алғыс, құрмет көрсете білуі керек дейтін едім. Ал осы разылығымызды Елбасымыздың айналасы жиырма жылдың ішінде тұрғызған, бүгінде жаһан жұртына атағы жеткен астанамыздың атын «Нұр-Сұлтан» деп өзгерту арқылы білдіруіміз дұрыс шешім деп есептеймін. Еткен еңбекті ескеретін, ұлысын ұлықтай алатын ел болуымыз бүгінгіге ғана емес келекшекке де үлгі болатын елеулі қадам екені сөзсіз. Бұл менің ғана емес, бейбіт елде білім алып, қалаған мамандығының иесі бола алатын, арман асқары биік және сол арманға жету жолында мемлекеттен де қолдау табатын жастардың көзқарасы екеніне күмәнім жоқ. Осы орайда қазағыма бір Алланың нұры жауып, әр ұлы сұлтандай, әр қызы ханшадай күн кешетін заманға жетейік деген тілек айтамын.

Пікір: