Тәуелсіздік - ұлы ұғым. Жұмыр жер бетінде азаттығын аңсап, бостандыққа қол жеткізе алмай жүрген ұлттар көп. Жыл, ай емес, минут сайын құбылатын алмағайып заманда Қазақстанымызбен мақтанып қана қоймай, тәуелсіздігімізді тұғырлы ету үшін баршамыз еңбек етуге тиістіміз. Ауданымыздағы байырғы ауылшаруашылығы ұжымдарының бірі – «Арна» жауапкершілігі шектеулі серіктестігі ел тәуелсіздігі жолында аянбай еңбек етіп жүрген қарапайым жұмысшыларды жұмылдырған ұжым.
Аудан бюджетіне салық ретінде жыл сайын 4 миллион теңгеден аса қаражат құятын бұл жауапкершілігі шектеулі серіктестік дәнді дақылдар егумен, мал шаруашылығымен айналысады. Шаруашылық басшысы қарамағындағы Ұзынбұлақ ауылы мен Көкпекті ауылы округі тұрғындарына жұмыс орнын ашып отырған әлеуетті ұжым. Бүгінде мал қыстату мен машина трактор паркінде жөндеу жұмыстарымен айналысып жатқан ұжым қытымыр қыстан қысылмай шығуды ойластыруда. Қамбасы дәнге, өрісі малға толған ұжым еңбеккерлері жыл бойындағы еңбектерінің жемісін көруде.

Тәуелсіздік күні мерекесіне орай Шығыс Қазақстан облысында өткен салтанатты жиында Көкпекті ауылдық округінің Ұзынбұлақ ауылында орналасқан «Арна» жауапкершілігі шектеулі серіктестігі басшысы Мұрат Кеңесұлы Жақыпов «Қазақстан Республикасының Президенті Н.Ә.Назарбаевтың 2018 жылғы 5 желтоқсандағы Жарлығы бойынша «Ерен еңбегі үшін» медалімен марапатталды. Салтанатты марапаттау облыстық әкімдік ғимаратында өткізілді. Еңбекпен тапқан ердің марапаты – «Ерен еңбегі үшін» медалін ұзынбұлақтық аграрий Мұрат Жақыповқа облыс әкімі Даниал Ахметов табыстады.
Еңбегі ерен ер аға - Мұрат Кеңесұлы Жақыповты мемлекеттік наградасымен құттықтай отырып, аудан игілігі мен дамуына қосқан үлесі үшін айтылатын жақсы тілектер легіне қосыламыз.

Пікір: