Бұл жағдай Биғаш ауылында орын алды. 10 тамыз күні аудан әкімі Асхат Смаилов жұмыс сапарымен Биғаш ауы-лына барды. Төбесінен су ағатын мектептің шатырына шығып, жүргізіліп жатқан жөндеу жұмыстарын көзімен көрді. Жергілікті бюджеттен арнайы қаражат бөлінген шаруа әлі де шешілмеген. Ал ауылдық округ әкімі Дулат Оспанов пен мектеп директоры Архат Қабден болса еңбек демалысына шығып кетіпті.
- Жаңа оқу жылының басталуына санаулы уақыт қалды. Осы уақытқа дейін жүктелген тапсырманың бір де бірі орындалмаған. Жүргізіліп жатқан жұмыс сапасыз. Ауыл әкімі мен мектеп директорының жауапкершілігі қайда? Біздің міндетіміз халыққа адал қызмет көрсету екенін ұмытпасын, - деді наразылығын жасырмаған Асхат Сайдахметұлы.

В.Маяковский атындағы мектептің спорт залы қаңырап бос тұрғалы қашан. Талай келелі кеңестер мен алқалы жиындарда айтылып жүргені болмаса, шешімін таппай жүрген мәселе. Мамыр айының соңында аудан әкімі Биғаш ауылына жұмыс сапарының барысында бұл мәселемен жеке танысқан болатын. Бірінші кезекте төбеден аққан суды тоқтатып, ескірген шатырды ауыстыру қолға алынды. Аудан бюджетінен құрылысқа қажетті қаражат бөлініп, орындау ауыл әкімі мен мектеп директорына жүктелді. «Тапсырманы тиянақты орындап, биылғы жылы су өтпейтін етіп қоямыз. Келесі жылы спортзалдың ішін өз күшімізбен жөндеп алу мәселесін тағы қарастырамыз» - деп нақты айтқан еді аудан басшысы.
Сонымен бірге, ауылдағы әлеуметтік маңызды нысандарды абаттандыру бойынша берілген тапсырма да орындалмаған. Мектеп ауласында моторлы құдығы барына қарамастан көгалдандыру тұрғысында ешбір жұмыс қолға алынбаған. Ауыл әкімшілігінің ғимараты да көз тартады деуге келмейді.
Тағы бір үлкен мәселе – бастау. Биғаштықтар қасиеті мол деп қастерлейтін бастау маңы бүгінгі күні аянышты жағдайда. Қыста мұз қатып, қызыл су көтерілгені тағы есте. Биылғы жылы бастаудың маңын қоршаймыз деп сұраған ауыл әкіміне ауданнан қаражат та бөлінді. Алайда, қазіргі уақытта бастаудың басы «баяғы жартас сол жартас» күйінде тұр.
Ертеден бірлігі бекем Биғаш тұрғындары ортақ іске келгенде жұмыла кететіні бізге белгілі. Тек сол жұмысты дұрыс ұйымдастыру жағы ақсап тұр бүгін. Десек те, жұмыстары қатал сынға алынған ауыл әкімі мен мектеп директоры тың күшпен іске құлшына кіріседі деп сенеміз.

Дархан БЕРДІБЕК

Пікір: