Қысқы ойындардың ішінде мәр-тебесі жоғары спорт түрі – бұл, әрине, шайбалы хоккей. Бүгінгі таңда шайбалы хоккей Қазақстанда даму үстінде. Республикалық деңгейдегі чемпионатттар, балалар мен жасөспірімдер арасындағы әртүрлі дәрежедегі жарыстар осы сөзімізге дәлел бола алады. Қазіргі кезге дейін мұз айдынында өнер көрсетіп жүрген Өскеменнің «Қазмырыш-Торпедосы», Астананың «Барысы», Қарағандының «Қазақмысы», Павлодардың «Ер-тісі», Алматының «Еңбегі» өз облыстарының намысын қолдан бермейтін мықты командалар.

«Ат тұяғын тай басар» дегендей, қазақ - ата жолын қуған, дәстүр жалғастығын сақтап келген халық. Міне, жоғарыда аталған, биік шыңдарды бағындыра білген командалардың ізін жалғап, солардың өнерлерін өздеріне үлгі тұтып жүрген шайбалы хоккейдің жас қырандары біздің ауданда да баршылық. Аудан бо-йынша шайбалы хоккей ойынының ең үздік командасын анықтау мақсатында 23 қаңтар күні Үлкенбөкен ауылының орталық мұз айдынында Көкпекті ауданы әкімі Р.Сағандықовтың қатысуымен мектеп оқушылары арасында турнир өткізілді. Аталмыш турнирге Үлкенбөкен ауылы, Үлгілімалшы ауылы, Көкпекті орта мектебі, Теректі, Мамай ауылының командалары қатысып, тартысты ойын көрсетті. Турнирдің салтанатты ашылу рәсімінде Көкпекті ауданы білім беру, спорт және денешынықтыру бөлімінің басшысы Шолпан Нұрғазықызы Мұстафинова, Үлкенбөкен ауылдық округінің әкімі Нұрлан Назарханов құттықтау сөз сөйлеп, барлық жиналған командаларға сәттілік тіледі. 
Ортаға жеребе тасталып, алғаш сайысқа түсетін командалардың аттары да белгілі болды. Жарысты бастау үшін шайбыны ортаға тастау құқығы Үлкенбөкен командасының бапкері Есет Нұрғазыұлы Тукушевке берілді. Шайбалы хоккей шеберлері айдынға шығып, тартысқа толы дода басталып кетті. 
Шайбалы хоккей өрендері арасында өткен жарыстың соңында сайыстың нәтижесі белгілі болды. Тартысты ойынның қорытындысы бойынша жоғарғы топтар арасында І-орынды Абай орта мектебінің оқушылары, ІІ-орынды Үлкенбөкен ОМ иеленсе, ІІІ-орынды Қ.Аухадиев атындағы орта мектебінің оқушылары жеңіп алды. Орта топтағылар арасынан І-орынды Үлкенбөкен ОМ, ІІ-орынды Қ.Аухадиев атындағы ОМ, ІІІ-орынды Көкпекті ОМ алса, кіші топ ойыншыларының арасында І-орын Үлкенбөкен ОМ, ІІ-орын Абай орта мектебінің оқушылары, ІІІ-орынды Қ.Аухадиев атындағы ОМ оқушылары қанжығалады. 
Жеңімпаз атанған команда мен барлық жүлдегер ойыншыларға аудандық спорт бөлімі тағайындаған мақтау қағаздары мен сыйлықтар табыс етілді. Біз өз кезегімізде, осындай жас өрендер арасынан ертеңгі күні әлемдік спорт ареналарында қазақ елінің намысын асқақтататын чемпиондардың шығуына тілектестік білдіреміз.

Клара ҚАЙЫПЖАНҚЫЗЫ

Пікір: