ҚЫМБАТТЫ ЖЕРЛЕСТЕР! АРДАҚТЫ АҒАЙЫН!
Сіздерді Қазақстан Республикасының Тұңғыш Президенті күнімен шын жүректен құттықтаймыз!
Жаңа тәуелсіз мемлекеттің іргетасын қалаушы Нұрсұлтан Назарбаев – барлық қазақстандықтар және халықаралық қоғамдастық мойындаған ғаламдық бастамалардың бастаушысы, отандастарымыздың құқықтары мен бостандықтарының қорғаушысы, елді кемел келешекке жетелейтін игі істердің қолдаушысы.

1991 жылы 1 желтоқсанда алғаш рет Қазақ ССР Президентінің жалпыхалықтық сайлауы өтіп, ол сайлауда Нұрсұлтан Әбішұлы Назарбаев ел Президенті болып сайланғаны баршамызға мәлім. Жоғары Парламенттің бекітуімен 2012 жылы 1 желтоқсан Қазақстанда алғаш рет – Тұңғыш Президент күні мемлекеттік мереке ретінде аталып өтіп, бұл баршамыз үшін қуанышты оқиға болды. Яғни, өз тағдырын өзі айқындауға алғашқы қадам жасаған Қазақстан үшін бұл күн – мемлекеттің тарихының мерейлі күні саналуға орны лайықты.

Ел тарихында елеулі күндердің бірі болып саналатын Тұңғыш Президент күні баршамыздың ортақ қуанышымыз. Н.Ә.Назарбаев Президент болып тағайындалған күннен бастап, Қазақстанның тәуелсіз мемлекет ретінде дамуына сара жол сала білді. Елбасының көрегендігі мен салиқалы саясатының арқасында мемлекетіміз аз уақыттың ішінде әлемге танылып, алпауыт елдермен терезесі тең келетін дәрежеге жетті.
Елбасына деген ел құрметін айрықша айғақтауға арналған бұл мерекені, бүкіл қазақстандықтармен бірге, Көкпекті ауданының тұрғындары да шынайы сезіммен атап өтетіні анық.
Осындай жарқын мерекемен барша жерлестерімізге құттықтау тілегімізді жолдай келе, мемлекетімізге одан әрі өрлеу мен өркендеу, әрбір қазақстандыққа – мол табыс, бақ-дәулет тілейміз! Арайлап атқан әр таңдарыңыз қуаныш пен шаттыққа толы болып, бейбіт аспан төрінде Әнұранымыз асқақтап, көк Байрағымыз желбірей берсін!

Р.Сағандықов, аудан әкімі
Т.Сарманов, аудандық мәслихат хатшысы

Пікір: